ABŞ-də iyulun 23-də keçirilən hərraclarda Alphabet və Tesla şirkətlərinin səhmləri süni intellektə (AI) yatırımları artırmaq planlarını açıqlamalarından sonra kəskin ucuzlaşıb. Bu barədə CNBC bazar məlumatlarına istinadən xəbər verib.
Hərrac zamanı Alphabet-in səhmləri 7,4% azalaraq minimum 316,6 dollara, Tesla-nın səhmləri isə 13,7% ucuzlaşaraq 322,7 dollara düşüb.
CNBC-nin məlumatına görə, hər iki şirkət iyulun 22-də rüblük hesabatlarını dərc edərək mənfi sərbəst pul axını (free cash flow) və kapital xərclərinin (capex) əhəmiyyətli artımı barədə məlumat verib.
Tesla bildirib ki, ikinci rübdə kapital xərcləri illik müqayisədə 142% artaraq 5,79 milyard dollara çatıb. Şirkət ilin yekununda bu göstəricinin 25 milyard dolları ötəcəyini gözləyir.
Alphabet isə cari il üçün kapital xərcləri proqnozunu 190 milyard dollardan 205 milyard dollara yüksəldib. Şirkət həmçinin xəbərdarlıq edib ki, 2027-ci ildə capex daha da yüksək olacaq.
Quilter Cheviot şirkətinin texnologiya araşdırmaları üzrə rəhbəri Ben Barringer bildirib ki, investorlar mənfəətlilik proqnozlarının zəifləməsi fonunda kapital xərclərinin kəskin artmasına diqqət yetiriblər. Onun sözlərinə görə, Alphabet-in Gemini 3.5 Pro modelinin buraxılışındakı gecikmələr və diqqətçəkən yeni məhsulların olmaması şirkətin AI sahəsinə yatırımlarının həqiqətən rəqabət üstünlüyü yaradıb-yaratmadığı ilə bağlı suallar doğurur.
Bununla yanaşı, Alphabet-in hesabatında müsbət məqam da olub. Google Cloud bölməsinin gəlirləri illik müqayisədə 82% artaraq 24,8 milyard dollara çatıb və analitiklərin gözləntilərini üstələyib.
Janus Henderson şirkətinin portfel meneceri Alison Porter qeyd edib ki, bu, Alphabet üçün son beş ilin ən güclü rüblərindən biridir. Onun sözlərinə görə, Alphabet süni intellekt bumunun əsas benefisiarlarından biri olaraq qalır və şirkətin həm kapital xərcləri, həm də bu investisiyaların səmərəliliyi baxımından nəticələri “olduqca ümidvericidir”.
