“Uber” ABŞ-də dronlarla çatdırılma xidmətinə başlayacaq.
“Reuters”ə istinadən xəbər verilir ki, “Uber Technologies” və “Zipline” şirkətləri ABŞ-də “Uber Eats” müştəriləri üçün avtonom dronlarla çatdırılma xidmətinin işə salınması məqsədilə tərəfdaşlıq barədə razılığa gəliblər.
Tərəfdaşlıq çərçivəsində “Uber” dronla çatdırılma şirkəti “Zipline”a strateji investisiya da yatırıb.
Şirkətlər 2029-cu ilin sonunadək gündə 1 milyon dron çatdırılmasına nail olmağı planlaşdırırlar. İlk çatdırılmaların bu ilin sonunda həyata keçirilməsi nəzərdə tutulur.
Xidmət əvvəlcə “Zipline”ın ABŞ-də artıq fəaliyyət göstərdiyi ərazilərdə istifadəyə veriləcək. Daha sonra isə onlarla əlavə şəhərə genişləndiriləcək.
Dörd qitədə fəaliyyət göstərən “Zipline” indiyədək 2 milyon çatdırılma həyata keçirib. Şirkət bu ilin əvvəlində 800 milyon dollar investisiya cəlb edib. Son qiymətləndirməyə əsasən, “Zipline”ın dəyəri 7.6 milyard dollar təşkil edir.
