ABŞ 65 milyard bareldən çox Venesuela neftinə nəzarət etmək planlarını açıqladıqdan sonra Vaşinqton Çini və Rusiyanı ölkədən sıxışdırıb çıxarmaq niyyətindədir.
Banker.az bunu Bloomberg-ə istinadən xəbər verir.
Agentliyə görə, növbəti addımlardan biri milyardlarla dollar məbləğində Çin qarşısında öhdəlikləri də əhatə edən Venesuela borcunun restrukturizasiyası ola bilər. ABŞ-ın energetika naziri Kris Rayt çərşənbə günü Pekinin Venesuelada neft hasilatından əldə olunan gəlirlərə iddia etməyəcəyini bildirib. Bu isə Karakasın borc ödənişləri üçün əsas kanalını bağlayır.
Çin üçün iqtisadi zərər məhdud qala bilər: 2025-ci ildə Venesuela nefti Çinin neft idxalının cəmi 4%-ni təşkil edib, Karakasın Çin banklarına borcu isə ən azı 10 milyard dollar qiymətləndirilir. Bu, 2015-ci ilədək verilmiş 60 milyard dollardan çox kreditdən xeyli azdır.
Əsas itki isə Çinin Şandun əyalətindəki neft emalı zavodlarının bitum istehsalında istifadə etdiyi ağır Venesuela nefti ola bilər. Tədarükün azalması artıq bazarı sıxlaşdırıb və fyuçers qiymətlərinin kəskin artmasına səbəb olub.
