Rusiya Bankı (mərkəzi bank) uçot dərəcəsini illik 14% səviyyəsində saxlayıb. Banker.az-ın yerli KİV-ə istinadən xəbərinə əsasən, qərardan sonra rublun məzənnəsində ciddi dəyişiklik olmayıb, Rusiya səhmləri isə bir qədər ucuzlaşıb.
Bankın Direktorlar Şurası sentyabrın 11-də uçot dərəcəsinin 14% səviyyəsində saxlanılmasına qərar verib. Tənzimləyici qeyd edib ki, iqtisadiyyat mülayim templərlə böyüyür, lakin qiymət təzyiqləri güclənib. İstehsal güclərinin azalması fonunda dayanıqlı qiymət artımı illik 5–6%-ə yüksəlib. Sentyabrın 7-nə inflyasiya 6,3% təşkil edib.
İnflyasiya gözləntiləri yüksək olaraq qalır və bu, qiymət artımının yavaşlamasını çətinləşdirə bilər. İstehlak aktivliyi zəifləsə də, yüksək səviyyədə qalır, investisiyaların bərpası isə davam edir. Əmək bazarında kadr çatışmazlığı azalır, lakin əməkhaqqı artımı məhsuldarlığın artımından geri qalır. İşsizlik bir qədər yüksəlib.
Pul-kredit şərtləri orta dərəcədə sərt olaraq qalır. Kredit aktivliyi, xüsusilə korporativ seqmentdə, yüksəkdir. Əhalinin yığım meyli azalsa da, hələ də yüksək səviyyədədir. İnflyasiya riskləri üstünlük təşkil edir. Bu risklərə tələb və təklif arasındakı disbalans, əməkhaqqının artımı və geosiyasi gərginlik daxildir. Tələbin zəifləməsi isə inflyasiyanı aşağı sala biləcək əsas amillərdən biri kimi qiymətləndirilir.
Rusiya Bankı büdcə kəsirinin 2029-cu ilə qədər sıfıra enəcəyini proqnozlaşdırır. Hökumətin təqdim etdiyi yeni büdcə proqnozu isə pul-kredit siyasətinə təsir göstərə bilər.
