ABŞ-nin maliyyə naziri Skott Bessent çərşənbə axşamı bildirib ki, Donald Tramp administrasiyası Çində hazırlanmış süni intellekt modellərinin Amerika texnologiyaları əsasında yaradılıb-yaradılmadığını araşdırmaq niyyətindədir. Onun sözlərinə görə, hökumət “əqli mülkiyyətin oğurlanmasını” qətiyyən qəbul etmir.
Açıq çəkilərə (open weights) malik Çin süni intellekt modelləri OpenAI və Anthropic kimi Amerika şirkətlərinin qabaqcıl həlləri ilə rəqabət apararaq populyarlıq qazanır. Bu vəziyyət texnologiya şirkətləri və ABŞ rəsmiləri arasında ölkənin süni intellekt sahəsində liderliyini qoruyub saxlaya bilməyəcəyi ilə bağlı narahatlıqları artırır. Çin startapı Moonshot AI bu yaxınlarda bir sıra əsas göstəricilər üzrə rəqiblərini üstələyən Kimi K3 modelini təqdim edib. “Açıq çəkilər” dedikdə, təlimdən sonra model parametrlərinin yüklənməsi üçün açıq şəkildə paylaşılması, lakin əsas kodun və təlim məlumatlarının məxfi saxlanılması nəzərdə tutulur.
Bessent Fox Business telekanalının “Mornings with Maria” proqramında bildirib ki, əgər xarici şirkətlərin əqli mülkiyyət oğurluğu ilə məşğul olduğu müəyyən edilərsə, ABŞ onlara qarşı sanksiyalar tətbiq edə bilər. O əlavə edib ki, “distillasiya” mövcud daha mürəkkəb model əsasında daha sadə modelin öyrədilməsi üsulunu ifadə edən texniki termindir. Ötən ay Anthropic ABŞ Senatına göndərdiyi məktubda Çin şirkəti Alibaba-nı indiyədək ən böyük distillasiya hücumunu həyata keçirməkdə ittiham etmişdi.
Reuters agentliyinin məlumatına görə, ABŞ və Çin sentyabr ayında süni intellektin inkişafı ilə bağlı danışıqlar keçirməyi planlaşdırırlar. ABŞ tərəfini həmin danışıqlarda Skott Bessent təmsil edəcək.
Nazirin sözlərinə görə, bir çox Çin süni intellekt modellərində böyük həcmli mətnlərin emalı üçün istifadə olunan Amerika texnologiyalarının izləri aşkar edilib. O bildirib ki, bu qəbuledilməzdir və ABŞ hökuməti yaxın günlər və ya həftələr ərzində bu məsələ ilə məşğul olacaq.
Bununla yanaşı, Anthropic və OpenAI şirkətləri də son illərdə özləri plagiat ittihamları ilə üzləşiblər.
Sentyabr ayında Anthropic əsərlərinin süni intellekt modellərinin öyrədilməsi üçün qanunsuz istifadə edildiyini iddia edən müəlliflərə 1,5 milyard dollar təzminat ödəməyə razılaşıb. 2023-cü ildə isə The New York Times qəzeti OpenAI və Microsoft şirkətlərinə qarşı müəllif hüquqlarının pozulması iddiası ilə məhkəmə iddiası qaldırıb.
