ABŞ fond bazarında müəyyən korreksiya baş verib. S&P 500 indeksi 0,06%, Dow Jones 0,11%, Nasdaq Composite isə 0,32% geriləyib. Səhər saatlarında S&P 500 üzrə fyuçerslər 0,14% yüksəlir.
Intel səhmləri şirkətin səhm satışı vasitəsilə 15 milyard dollar cəlb etməyi planlaşdırdığını açıqlamasından sonra 4,1% ucuzlaşıb. Nvidia səhmləri isə təxminən 3% dəyər itirib. Buna səbəb süni intellekt infrastrukturu üçün 500 milyard dollarlıq maliyyələşdirmə paketinin yaradılması məqsədilə şirkətin Apollo Global və Blackstone ilə əməkdaşlıq etməsi barədə məlumat olub.
Asiya fond indeksləri qarışıq dinamika nümayiş etdirir. Honq-Konqun Hang Seng indeksi 0,6%, Çinin Shanghai Composite indeksi 0,13% geriləyir, Cənubi Koreyanın Kospi indeksi isə 1% yüksəlir. Yaponiyada bu gün qeyri-iş günüdür və birjalarda ticarət aparılmır.
İnvestorların Hörmüz boğazının yenidən açılması ilə bağlı razılaşmanın əldə olunacağına inamı əvvəlki qədər güclü deyil. Yaxın Şərqdəki böhranın həllinə dair nikbinliyin azalması fonunda ABŞ neftinin qiyməti təxminən 5% yüksələrək bir barel üçün 82 dolları ötüb.
Hörmüz boğazı vasitəsilə neft tədarükünün bərpası enerji qiymətlərinin artması ilə bağlı narahatlıqları azalda bilər. Bu qiymət artımları inflyasiyanı gücləndirib və mərkəzi bankların faiz dərəcələrini artırmaq məcburiyyətində qala biləcəyi ilə bağlı narahatlıq yaradıb.
Bakı vaxtı ilə saat 09:30-a olan məlumata görə, Brent markalı neft 0,2% bahalaşaraq 87,93 dollara, ABŞ-nin WTI nefti isə 0,3% artaraq 82,41 dollara çatıb. Qızılın qiyməti 0,7% yüksələrək bir unsiya üçün 4 451,6 dollar təşkil edib.
