Banker.az xəbər verir ki, bankomat istehsalı üzrə dünya lideri NCR şirkəti BƏƏ-də kriptovalyuta birjası ilə əməkdaşlıq edərək, istifadəçilərə ATM vasitəsilə öz kriptovalyuta hesablarından pul nağdlaşdırmağa imkan verəcək.
Şirkətin verdiyi məlumatda qeyd edilir ki, bankomat vasitəsilə bitcoin-hesabdan vəsait çıxarmaq hər hansı bir kassa əməliyyatını həyata keçirmək qədər sadədir.
Pul nağdlaşdırmaq istifadəçinin identifikasiyasından başlayır. Belə ki, istifadəçi öz kartını bankomata daxil etməli, ya da smartfonu ATM-ə yaxınlaşdıraraq təmassız autentifikasiyadan keçməlidir.
Bunun ardınca, istifadəçi hansı hesabdan pul çıxaracağını seçməlidir. Standart bank hesabları hissəsində istifadəçinin CoinHub kriptovalyuta platformasındakı hesabı da qeyd ediləcək.
