Avropa Mərkəzi Bankı (AMB) 2023-cü ildən bəri ilk dəfə olaraq üç əsas faiz dərəcəsini 25 baza bəndi artıraraq 2,4%, 2,25% və 2,65%-ə çatdırıb. Bu barədə tənzimləyicinin bəyanatında deyilir.
“İdarə Heyəti Avropa Mərkəzi Bankının üç əsas faiz dərəcəsini 25 baza bəndi artırmaq qərarına gəlib. Buna uyğun olaraq depozit imkanı üzrə faiz dərəcəsi 2,25%-ə, əsas yenidən maliyyələşdirmə əməliyyatları üzrə faiz dərəcəsi 2,40%-ə, marjinal kreditləşmə imkanı üzrə faiz dərəcəsi isə 2,65%-ə yüksəldiləcək. Yeni dərəcələr 17 iyun 2026-cı il tarixindən qüvvəyə minəcək”, – məlumatda bildirilir.
AMB-də qeyd ediblər ki, İdarə Heyəti orta müddətli perspektivdə inflyasiyanın 2%-lik hədəf səviyyəsində sabitləşdirilməsini təmin edəcək pul-kredit siyasətinin həyata keçirilməsinə sadiqdir. Bu öhdəliyə uyğun olaraq, bu gün Avropa Mərkəzi Bankının üç əsas faiz dərəcəsinin 25 baza bəndi artırılması barədə qərar qəbul edilib.
“Yaxın Şərqdəki müharibə inflyasiya təzyiqlərini gücləndirir və faiz dərəcələrinin artırılması qərarı bu şokun mümkün inkişafını və onun avrozona iqtisadiyyatının orta müddətli perspektivlərinə təsirini təsvir edən geniş ssenarilər spektri çərçivəsində əsaslandırılmış addımdır”, – deyə bəyanatda əlavə olunub.
