Avropa Yenidənqurma və İnkişaf Bankı (EBRD/AYİB) 24 000 kvadratmetr ümumi icarə sahəsi olan, üç müasir və enerjiyə qənaət edən quru anbarın tikintisi üçün “Gemza Group” MMC-yə 5,6 milyon avroya qədər yüksək səviyyəli zəmanətli kredit ayırıb.
Bu barədə EBRD-nin rəsmi saytında qeyd edilir.
“Gemza Group” istehsal və xidmət sektorunda fəaliyyət göstərir, lakin hazırda anbar biznesinə girərək gəlir mənbələrini şaxələndirir.
Kredit Azərbaycanda müasir anbar çatışmazlığını aradan qaldırmaq, ölkənin təchizat zəncirinin dayanıqlılığını gücləndirmək və Orta Dəhliz boyunca anbar imkanlarını artırmaq üçün nəzərdə tutulub.
Müqavilə həmçinin enerji xərclərini əhəmiyyətli dərəcədə azaltmaqla 1 MVt-a qədər elektrik enerjisi istehsal etmək üçün Günəş panellərinin yerində quraşdırılmasını da əhatə edir.
“Gemza Group” Azərbaycanda mühəndislik, satınalma və təmir xidmətləri göstərən yerli müəssisədir. Türkiyə, Birləşmiş Ərəb Əmirlikləri və bəzi Orta Asiya bazarlarına çıxışı olan şirkət öz müəssisəsində mexaniki avadanlıqlar üçün ehtiyat hissələri istehsal edir və təmir işləri aparır.
