Bazar ertəsi keçirilən hərraclarda Avropada təbii qazın birja qiymətləri 4,5% yüksəlib. Buna həftəsonu Hörmüz boğazında gəmilərə qarşı hücumların yenidən başlamasından sonra Fars körfəzindən tədarüklərin perspektivləri ilə bağlı narahatlıqların artması səbəb olub.
İndi treyderlər ABŞ və İran arasında yeni danışıqlar raundunda vəziyyətə aydınlıq gətiriləcəyini gözləyirlər. ABŞ prezidenti Donald Trampın sözlərinə görə, danışıqlar çərşənbə axşamı Dohada keçiriləcək. Bununla belə, İranın yarı-rəsmi “Tasnim” agentliyi regiondakı vəziyyətlə bağlı heç bir texniki danışıqların planlaşdırılmadığını bildirib.
Regionun əsas oyunçularından olan Qatar Hörmüz boğazında gəmiçiliyin normallaşmasından sonra mayeləşdirilmiş təbii qazın (LNG) istehsalını və ixracını sürətlə artırmağı planlaşdırır.
“Qlobal LNG bazarında təklifin dinamikası əsasən Qətərdə istehsalın bərpasından asılı olacaq”, – deyə “BloombergNEF” analitikləri bildiriblər. “Lakin gəmilərin sığorta xərclərinin yüksək olması, ekipajların təhlükəsizliyi ilə bağlı narahatlıqlar və regionda tanker sıxlığının artması bu bərpanı ləngidə bilər”.
“BloombergNEF”in baza ssenarisinə görə, iyul ayında qlobal LNG tələbi iyun ayı ilə müqayisədə 5%, ötən ilin eyni dövrü ilə müqayisədə isə 3% artacaq.
