Dünyanın qabaqcıl tütün məmulatları istehsalçısı – “Japan Tobacco International” (JTİ) və Azərbaycana məxsus “Tabaterra” QSC arasında JTİ şirkətinin qlobal brendlərinin Azərbaycanda istehsal olunaraq Gürcüstana ixrac edilməsi üçün razılaşma əldə edilib.
Strateji tərəfdaşlıq çərçivəsində “JTİ” şirkətinə məxsus Gürcüstanda satılan “Sobranie”, “Winston” və “Camel” kimi dünyaca məşhur brendlərini “Tabaterra” Azərbaycanda istehsal edəcək.
“İmzalamış olduğumuz ixrac sazişi ölkəmizə illik olaraq 13 milyon ABŞ dolları civarında valyuta axınını təmin edəcək”, – deyə “Tabaterra”nın direktoru Elman Cavanşir bildirib.
“Tabaterra” ilə imzaladığımız ixrac razılaşması JTİ şirkəti üçün Gürcüstan bazarında mövqeyimizin möhkəmləndirilməsi baxımından böyük əhəmiyyət kəsb edir. Biznes tərəfdaşımız olan “Tabaterra”nın təcrübəsinə və istehsal imkanlarına əmin olaraq, biz Sobranie, Winston və Camel kimi dünyəvi brendlərimizi Azərbaycanda istehsal etməklə onların daha qısa zaman kəsiyində gürcü istehlakçıları üçün əlçatanlığını təmin edəcəyik. İmzalamış olduğumuz ixrac sazişi Azərbaycan və Gürcüstan arasında olan ticarət dövriyyəsinin artmasına öz töhvəsini verəcək”, – deyə JTİ-nin Belarus və Qafqaz regionu üzrə Baş Direktoru Sergey Buksa bildirib.
“Tabaterra” 17 noyabr 2017-ci il tarixində Sumqayıt Kimya Sənaye Parkının rezidenti kimi qeydiyyatdan keçmişdir və öz məhsulları ilə yanaşı, “Japan Tobacco International”, “British American Tobacco” və “Imperial Tobacco Group” kimi şirkətlərin lisenziyası əsasında müxtəlif adda beynəlxalq tütün məmulatları istehsal edir.
JTI 130-dan çox ölkədə fəaliyyət göstərən beynəlxalq tütün və vapinq şirkətidir. Şirkət tütün məmulatlarının geniş çeşidinin istehsalı və marketinqinə fokuslanıb. Şirkətin baş ofisi İsveçrənin Cenevrə şəhərində yerləşir. JTI, “Sobranie”, “Winston”, “Camel”, LD, “Logic” və “Ploom” kimi məşhur brendlərin sahibidir.
