“Bank olmayan kredit təşkilatı Embafinans” QSC cari ilin əvvəli mənfəətindən səhmdarlarına böyük məbləğdə divident ödəyib.
Banker.az bu barədə 21 may 2021-ci il tarixdə təsdiqlənmiş “BOKT Embafinans”ın 2020-ci il üzrə audit hesabatındakı rəyə istinad edir. Rəyi tanınmış audit şirkəti “PwC” verib.
“2021-ci ilin yanvar ayında BOKT (şirkət) 3 milyon məbləğində dividend elan etmiş və səhmdarlarına ödəmişdir” – deyə, hesabatda qeyd edilir.
2020-ci ilin sonuna olan göstəricidən (5 milyon 763 min manat) isə məlum olur ki, 3 milyon manatlıq divident artıq hesabat müddətində ödənilib. Hesablamalara görə, 1 yanvar 2021-ci il tarixində BOKT-un balansında bölüşdürülməmiş mənfəəti həcmi 8 milyon 763 min manat olmalı idi. Belə ki, 1 yanvar 2020-ci il tarixdə bölüşdürülməmiş mənfəətin həcmi 5 milyon 933 min manat idi. Həmin maliyyə ili müddətində BOKT 2 milyon 829 min manat xalis mənfəət edib.
“BOKT Embafinans”ın səhmdarları 2019-cu il hesabatında 60%-i Elşad Abbasov İnşallah oğluna və 40%-i isə Milli Məclisin deputatı olan, “Embawood”dan tanıdığımız Məşhur Məmmədov Şahbaz oğluna məxsus idi. Hər iki səhmdar öz payından yeni investor Tamara Polyakovaya Başirovnaya satmışlar.
Beləliklə, 1 yanvar 2021-ci il tarixinə olan rəsmi məlumatda səhmlərin 51%-i Elşad Abbasova, 35%-i Məşhur Məmmədova və 14% isə Tamara Polyakovaya məxsus olacaq.
Yeni ildən elan edilmiş 3 mln. manatlıq divident, o zaman hər üç səhmdar tərəfindən bu rəqəmlərlə bölünəcəkdir:
- Elşad Abbasov – 1 530 000 manat;
- Məşhur Məmmədov – 1 050 000 manat;
- Tamara Polyakova – 420 000 manat.
