®Bank “BTB” ASC 2020-ci ilin maliyyə göstəricilərini təqdim etmişdir. Belə ki, bankın aktivləri 356 milyon 136 min manat təşkil edib, bu isə 2019-cu il ilə müqayisədə 4% artım deməkdir.
Bank BTB 2020-ci il ərzində kredit portfelini 3% artıraraq, 219 milyon 344 min manata çatdırmışdır. Adi və sosial ipoteka kreditlərinin üstünlük təşkil etdiyi istehlak kreditləşməsi ilə yanaşı, biznes kreditləşməsində də bank aktiv iştirak etmişdir. 2019-cu il ilə müqayisədə 2020-ci ildə Bank BTB-nin faiz gəlirləri 4 milyon 84 min manat, yəni 19% artaraq 26 milyon 101 min manat təşkil etmişdir.
2020-ci il ərzində bankın depozit portfeli 139 milyon 347 min manata çatmış, ötən il ilə müqayisədə 5% artım əldə edilmişdir. Artımın daha çox hissəsi əhalinin banka göstərdiyi etimad sayəsində əldə edilmişdir. Belə ki, 2020-ci ildə fiziki şəxslər tərəfindən banka yerləşdirilən depozitlərin həcmi 8% artaraq, 97 milyon 309 min manat təşkil etmişdir.
Müştəri portfelini genişləndirən Bank BTB 2020-ci il ərzində fiziki şəxs müştərilərinin sayında 7%, hüquqi şəxs müştərilərinin sayında 12%, nağdsız əməliyyatlar üzrə dövriyyədə isə 6% artıma nail olmuşdur.
Eyni zamanda Bank korporativ sosial məsuliyyət prinsiplərinə sadiq qalaraq əhalinin həssas qruplarına dəstək olmuş, 27 ailəni sahibkarlıq fəaliyyəti ilə məşğul olmaq üçün lazımi avadanlıqlarla təmənnasız təmin etmişdir. Bununla yanaşı, bank hər zaman olduğu kimi xalqımıza dəstək olmuş, Koronavirusla Mübarizə Fonduna və Silahlı Qüvvələrə Yardım Fonduna ianələr etmişdir.
Qeyd olunanlarla yanaşı, 2020-ci ilin yekunlarına görə bankın xalis əməliyyat gəlirləri 4 milyon 222 min manat, əməliyyat mənfəəti isə 1 milyon 944 min manat təşkil etmişdir.
Gələcəkdə yarana biləcək potensial risklərin qarşılanması məqsədi ilə bank tərəfindən konservativ yanaşma tətbiq edilmiş və 2020-ci il ərzində 11 milyon 74 min manat məbləğində ehtiyat yaradılmışdır.
Bankın əsas dayanıqlıq göstəricilərindən olan məcmu kapitalın adekvatlıq əmsalı 23.5% təşkil edir ki, bu isə təyin olunmuş normaya nisbətdə 2 dəfədən çox artıqdır. Qeyd olunan məlumatlardan aydın olur ki, bank inkişafı üçün kifayət qədər yüksək kapital ehtiyatına malikdir.
Qeyd edək ki, Bank BTB 2010–cu ildə təsis olunub və universal bank olaraq bütün növ bank xidmətləri göstərir. Bank daim müştəri məmnunluğunu üstün tutaraq bu istiqamətdə xidmət keyfiyyətinin yüksəldilməsi və əhatəsinin genişləndirilməsi, yeni rəqəmsal həllərin tətbiqi və inkişafı istiqamətində fəaliyyət göstərməyə davam edir.
Bankın hər hansı məhsul, xidmət və kampaniyaları barədə məlumat almaq istəyən şəxslər onlayn müraciət kanalları olan Facebook (www.facebook.com/bankbtb) və Instagram (www.instagram.com/bankbtb/) səhifələrinə, eləcə də 055 3000 946 WhatsApp (https://wa.me/994553000946) nömrəsinə müraciət edə bilərlər. Həmçinin, bankın məhsul və kampaniyaları haqqında (012) 946 nömrəli Məlumat mərkəzindən və www.btb.az rəsmi saytından məlumat əldə etmək mümkündür.
