Novruz bayramı münasibətilə banklarımızın keçirdiyi kampaniyalardan səmərəli istifadə edə bilərsiniz. Bankların bahar hədiyyəsi isə bir –birindən fərqlidir. Banker.az sizə hazırda banklarda bayram ilə əlaqədar olan kampaniyaları təqdim edir.
AG Bank
AGBank “Həzz Kart” sahibləri üçün nağlaşdırma kampaniyasına başlayır. Belə ki, kart istifadəçiləri mart ayının 16-dan – 22-dək “Həzz Kart” ilə 300 manatadək nağdlaşdırma əməliyyatlarını həyata keçirə biləcəklər. Bu isə o deməkdir ki, 7 günlük kampaniya çərçivəsində “Həzz Kart”-dan yalnız alış-veriş zamanı deyil, həmçinin nağd pul ehtiyacınızı ödəmək üçün istifadə edə biləcəksiniz. 3 aylıq opsiya üzrə nağlaşdırmanın komissiya haqqı 5% təşkil edir. Yəni, siz 300 manat nağdlaşdırma etdiyi halda 3 ay ərzində banka 315 AZN (5% nağdlaşdırmaya görə komissiya ilə birgə) vəsaiti hər ay 105 AZN ödəməklə geri qaytarmalısınız.
Amrahbank
Novruz bayramı ərəfəsində Amrahbank kampaniyasına start verir. “Endirim almağın ən asan yolu” kampaniyası 2015-ci il 10-31 mart tarixləri arasında keçiriləcək. Bu müddət ərzində “Amrahbank”ın Facebook səhifəsini bəyənən və kampaniyaya aid şəkili kütləvi (hər kəsə açıq) paylaşan şəxslər və ya onların ailə üzvləri kampaniya zamanı İstehlak və ya Mikro Biznes krediti götürdükdə illik 2% endirim əldə etmək imkanı qazanacaq.
Bank of Baku
Bank of Baku 19-22 mart tarixləri arasında Bolkart sahibləri üçün bayram kampaniyasını elan edir.
Kampaniyanın şərtlərinə görə qeyd olunan tarixlərdə “3,6,12 aya ödə” partnyorlarında alış-veriş edən Bolkart sahibləri əlavə olaraq 1 aylıq ödəmə imkanını qazanacaq və beləlilkə də 3 aylıq ödəməni 4 aya, 6 aylıq ödəməni 7 aya, 12 aylıq ödəməni isə 13 aya həyata keçirəcək. “1 aya ödə” partnyorlarında isə “indi al 2 ay sonra” kampaniyası keçərli olacaq. Mart ayında alış –veriş edənlər, ödəməni May ayının 10-dək əlavə xərcsiz etmək imkanını əldə edəcəklər.
DəmirBank
DəmirBank-ın Novruz bayramı münasibətilə “28 Mall” ticarət mərkəzində keçirdiyi bayram aksiyasında “Selfie çək, hədiyyə qazan” foto müsabiqəsi davam edir. Bu dəfə də ən çox bəyənilən foto sahibi günün qalibi elan edilərək dəyərli hədiyyələr əldə edəcək. Qeyd edək ki, foto müsabiqədə iştirak edən hər bir şəxsə kreditlərdə 3% endirim, depozitlərdə 1% əlavə faiz əldə etmək hüququ verən xüsusi imtiyaz kuponları təqdim edilir.
Kapital Bank
Novruz bayramı münasibətilə martın 20-dən 27-dək “Kapitalkart”-la partnyor şəbəkədə aparılmış əməliyyatlar üzrə taksit sayına 3 taksit əlavə ediləcək. (1 aylıq opsiya ilə aparılmış əməliyyatlar istisna olunur). Xatırladaq ki, əlavə 3 taksitə görə partnyorun əvvəlcədən təyin olunmuş komissiyasından əlavə komissiya tutulmur. Məs:
20 mart tarixində partnyorda 9 taksitlə edilmiş əməliyyat 12 taksitə bölünür və 9 ay üzrə müəyyən olunmuş komissiya tutulur.
Unibank
Martın 19-dan 22-dək öz Albalı və Albalı Plus kartı ilə alış-veriş edənlərə 1 taksit də Unibankdan hədiyyə olunacaq. Unibank bayramı xarici ölkələrdə keçirmək istəyənlərə də möhtəşəm bayram həyəcanı yaşadacaq. Albalı Plus kartları ilə alış-veriş zamanı sms taksit xidmətindən əlavə 1 taksit kart sahiblərinə hədiyyə ediləcək.
