Milyarder Uorren Baffetin “Berkshire Hathaway” holqindi tibbi sığorta şirkəti “UnitedHealth”in 5 milyon səhmini 1.6 milyard dollara alıb, bu barədə mənbələrə istinadən “Bloomberg” məlumat yayıb. “Berkshire” həmçinin “T-Mobile”dakı payını 1 milyard dollara satıb.
Baffetin şirkətindən başqa, milyarder Devid Tepperin “Appaloosa Management” şirkəti də “UnitedHealth”in 2.3 milyon səhmini alıb. Qeyd edək ki, “UnitedHealth” “Appaloosa”nın 6.45 milyard dollarlıq portfelinin təxminən 11.9%-ni təşkil edir.
Xəbərlər fonunda “UnitedHealth” səhmləri avqustun 14-də ticarətin sonunda 12.53% artıb.
Baffett və Tepperin şirkətə sərmayəsi səhiyyə sığortaçısının çoxsaylı böhranlarla üzləşdiyi bir vaxta təsadüf edir. Belə ki, 2024-cü ilin sonlarında “UnitedHealth”in baş direktoru Brayan Tompson Manhettendə güllələnib. Bundan əlavə, “UnitedHealth” digər ABŞ səhiyyə sığortaçıları kimi tariflərlə əlaqədar gözlənilməz əlavə xərclərlə üzləşib.
