Neft şirkəti “Chevron”un maliyyə direktoru Eymiar Bonner cümə axşamı CNBC telekanalına bildirib ki, Yaxın Şərqdə vəziyyət sabitləşdikcə ABŞ-də benzinin qiymətləri enə bilər.
Bu açıqlama ABŞ prezidenti Donald Trampın iri neft şirkətlərini benzinin qiymətini süni şəkildə yüksək saxlamaqda ittiham etməsindən və neftin son ucuzlaşmasına baxmayaraq qiymətləri azaltmadıqları üçün onların fəaliyyəti ilə bağlı araşdırma aparılmasını tapşırmasından sonra verilib.
Trampın tənqidlərinə cavab olaraq Bonner bildirib ki, iri enerji şirkətləri vəziyyəti yaxşılaşdırmaq üçün əllərindən gələni edirlər. Lakin yanacaq qiymətlərinin nəzərəçarpacaq dərəcədə enməsi üçün vaxt tələb olunur.
Onun sözlərinə görə, neft qiymətlərindəki dəyişikliklərin yanacaqdoldurma məntəqələrindəki benzin qiymətlərinə təsir etməsi arasında müəyyən zaman fərqi mövcuddur.
“Vəziyyət sabitləşdikcə benzin qiymətlərinin də enəcəyini gözləyirik”, – deyə Bonner bildirib.
Tramp çərşənbə günü Ağ evdə jurnalistlər qarşısında çıxış edərkən “Chevron”, “Exxon Mobil” və “BP” şirkətlərinin adını çəkərək bildirib ki, yanacaqdoldurma məntəqələrində benzinin qiyməti xeyli aşağı olmalıdır. Onun fikrincə, bir qallon (3,785 litr) benzinin qiyməti 2,25 ABŞ dolları olmalı olduğu halda, hazırda bundan xeyli yüksəkdir.
“Exxon Mobil”, “Shell” və “BP” CNBC-nin sorğusuna cavab olaraq hələlik şərh verməyiblər.
Ötən həftə ABŞ və İran arasında müvəqqəti sülh sazişi imzalandıqdan sonra neft qiymətləri kəskin ucuzlaşıb. Bununla belə, Vaşinqton və Tehran 14 bənddən ibarət qarşılıqlı anlaşma memorandumunun detallarını müzakirə etməyə davam edirlər.
Cümə axşamı avqust tədarüklü Brent markalı neft fyuçersləri 1,3% ucuzlaşaraq bir barel üçün 72,75 ABŞ dollarına enib. West Texas Intermediate (WTI) markalı neftin qiyməti isə 1,1% azalaraq bir barel üçün 69,60 dollar təşkil edib.
