Çinin Sidian Universiteti kosmik günəş enerjisini sınaqdan keçirmək üçün dünyanın ilk inteqrasiya olunmuş yerüstü sınaq sisteminin tikintisini başa çatdırıb. Çinin şimalındakı Sidian şəhərində yerləşən 75 metr hündürlüyündə polad konstruksiyada kosmosa əsaslanan günəş enerjisi (SBSP) konseptlərinin sınaqdan keçirilməsi üçün alt sistemlər quraşdırılıb.
Banker.az bu barədə xarici medaiaya istinadən xəbər verir.
Obyekt günəş enerjisini toplamaq və onu elektrik enerjisinə çevirmək üçün nəzərdə tutulub. Sistem işığın konsentrasiyası, enerjinin mikrodalğalara çevrilməsi, mikrodalğaların ötürülməsi və dalğa formasının optimallaşdırılması, mikrodalğalı şüanın istiqamətinin ölçülməsi və idarə edilməsi, mikrodalğaların qəbulu və düzəldilməsi texnologiyalarını əhatə edir.
Həmçinin Çində günəş elektrik stansiyasının başqa bir konsepsiyası hazırlanır – optimal enerji istehsalı üçün günəş panellərinin meyl bucağını dəyişdirəcək Multi-Rotar (MR SPS) və ya çox dövrlü stansiya.
Çin Kosmik Texnologiyalar Akademiyası keçən il kiçik bir dirijabldakı faydalı yükdən və dənizdəki tədqiqat gəmisindəki qəbuledicilərdən istifadə edərək 300 metr məsafədə mikrodalğalı enerji ötürülməsi həyata keçirib.
