ABŞ dolları çərşənbə axşamı Federal Ehtiyat Sisteminin (FED) bu həftə faiz dərəcəsini artıracağı ehtimalının bazarlar tərəfindən qiymətləndirilməsi fonunda son dörd həftənin maksimumuna yaxın səviyyədə sabit qalıb. Neft qiymətlərinin ucuzlaşması inflyasiya ilə bağlı narahatlıqları qismən azaltsa da, ABŞ dövlət istiqrazlarının gəlirliliyinin yüksəlməsi və FED sədri Kevin Uorşun sərt mövqeyi faiz artımı gözləntilərini gücləndirib.
Dolların avroya, yenə və digər əsas valyutalara nisbətdə məzənnəsini əks etdirən dollar indeksi demək olar ki, dəyişməyərək 101,50 bənd səviyyəsində qalıb. Bu, iyulun 1-dən bəri ən yüksək göstəricidir. Avro cüzi bahalaşaraq 1,1370 dollara yüksəlib, Yapon yeni dollar qarşısında 163,745 səviyyəsində ticarət olunub, funt sterlinq isə 1,330 dollara qədər möhkəmlənib.
Dolların sabit qalması son aylarda FED-in siyasəti ilə bağlı gözləntilərin dəyişməsi ilə izah olunur. Apreldən bəri ABŞ dövlət istiqrazlarının gəlirliliyi artır. Buna ABŞ-İran münaqişəsinin inflyasiya risklərini yüksəltməsi və Kevin Uorşun sərt bəyanatları təsir göstərib.
Həftəsonu İrana qarşı hücumların dayandırılmasından sonra neft qiymətləri geriləsə də, istiqraz gəlirliliyi çoxaylıq maksimumlarda qalır.
Nomura şirkətinin analitiki Dominik Banninq bildirib ki, ABŞ istiqrazlarının gəlirliliyinin artması dolları ciddi şəkildə dəstəkləyir. Onun sözlərinə görə, investorlar faiz artımı ehtimalına həddindən artıq əmin olduqları üçün FED daha yumşaq mövqe sərgiləyərsə, dollar üzrə uzun mövqelərin sürətlə bağlanması riski mövcuddur.
ABŞ tənzimləyicisinin məlumatına əsasən, ötən həftə dollar üzrə xalis uzun mövqelər 2015-ci ildən bəri ən yüksək səviyyəyə çatıb.
FED çərşənbə günü pul-kredit siyasəti üzrə iki günlük iclasını başa çatdıracaq. Böyük broker şirkətləri bu ay neft qiymətlərinin artmasını nəzərə alaraq faiz dərəcəsinin artırılmasının mümkün olduğunu bildirirlər.
Bazar iştirakçıları çərşənbə günü faiz dərəcəsinin 25 baza bəndi artırılması ehtimalını 40% qiymətləndirirlər. Bir həftə əvvəl bu göstərici 20% idi. Sentyabr ayına qədər faiz artımı ehtimalı isə təxminən 95% təşkil edir.
İnvestorlar həmçinin ABŞ-də ikinci rüb üzrə ÜDM göstəricisini və FED-in əsas inflyasiya indikatoru olan PCE indeksini izləyəcəklər.
Avstraliya dolları Avstraliya Mərkəzi Bankının rəhbəri Mişel Bullokun baza inflyasiyasının yüksək olaraq qaldığını və daxili tələbin zəiflədilməsinin vacibliyini bildirməsindən sonra 0,3% ucuzlaşaraq 0,697 ABŞ dollarına enib. Yeni Zelandiya dolları isə 0,5772 ABŞ dolları səviyyəsində ticarət olunub.
Mərkəzi banklar üçün gərgin həftə
Gözləntilərə görə, İngiltərə Bankı cümə axşamı, Yaponiya Bankı isə cümə günü faiz dərəcələrini dəyişməz saxlayacaq. Hər iki tənzimləyici inflyasiya risklərinə görə ehtiyatlı mövqe nümayiş etdirəcək.
Treyderlər ötən həftə yenin dollar qarşısında son 40 ilin minimumu olan 163,99 səviyyəsinə enməsindən sonra Yaponiyanın mümkün valyuta müdaxiləsini diqqətlə izləyirlər.
Analitiklərin fikrincə, Yaponiya Bankı milli valyutanı dəstəkləmək məqsədilə gələcək faiz artımlarına işarə edə bilər. Lakin pul-kredit siyasətinin sərtləşdirilməsi ilə bağlı konkret vaxt və temp barədə qeyri-müəyyənlik qalacaq.
Dominik Banninq qeyd edib ki, Yaponiya Bankının sərt bəyanat verməsi və Maliyyə Nazirliyinin eyni vaxtda bazara müdaxilə etməsi ideal ssenari olardı. Bununla belə, o hesab edir ki, belə addımların təsiri məhdud ola bilər.
Xatırladaq ki, Tokio aprel və may aylarında yenin məzənnəsi dollar qarşısında 160 səviyyəsini keçdikdə valyuta bazarına müdaxilə etmişdi. Lakin bu, yenin ümumi zəifləmə tendensiyasını əhəmiyyətli dərəcədə dəyişməmişdi.
Yaponiyanın maliyyə naziri Satsuki Katayama hökumətin valyuta bazarındakı kəskin dəyişikliklərə reaksiya vermək mövqeyinin dəyişmədiyini bildirib və Vaşinqtonun da bu yanaşmanı dəstəklədiyini vurğulayıb.
Bu arada, Yaponiyanın Kumamoto prefekturasında baş verən 7,1 bal gücündə zəlzələ yenin məzənnəsinə nəzərəçarpacaq təsir göstərməyib.
Kriptovalyuta bazarında isə bitkoin 2,3% ucuzlaşaraq 63 414,16 dollara, Ethereum isə 3,4% dəyər itirərək 1 879,71 dollara enib. Bu, son bir ayın ən kəskin günlük enişi olub.
