Dünyanın ən varlı adamı olan Jeff Bezos-un sərvəti bir ildə ikinci dəfə 200 milyard dollar keçərək 203,7 milyard dollara çatıb. Xatırladaq ki, ilk dəfə belə bir rekord avqustun 25-də qeydə alınmışdı.
Banker.az bu barədə “Forbes.ru”ya istinadən xəbər verir.
Bildirildiyi kimi, Bezos-un kapitalı 90%-dək “Amazon” səhmlərindən ibarətdir. Bazar ertəsi günü reteylerin qiymətli kağızları 6% bahalaşaraq 3 484,3 dollar səviyyəsinə çatıb. Mütəxəssislərin sözlərinə görə, bunun əsas səbəbi 13 və 14 oktyabr tarixlərinə keçiriləcək kütləvi satışlardır.
Hələ 2020-ci il yanvarın 1-də Jeff Bezos-un sərvəti 115 milyard dollar dəyərində qiymətləndirilirdi. Bu ilin avqust ayında isə milyarderin sərvəti 200 milyard dolları ötdü. Əslində bu daha tez baş verə bilərdi, lakin 2019-cu ildə o, həyat yoldaşı Mackenzie Skott ilə boşanaraq, “Amazon”dakı payının dörddə bir hissəsini ona bağışladı. Hal-hazırda Skott 65,6 milyard dollar sərvətə sahibdir.
