Əcnəbilərin portfellərindəki manat depozitləri kəskin böyüyür

Azərbaycanda qeyri-rezidentlərin banklardakı depozitlərinin həcmi 2026-cı ilin iyul ayında 1 milyard 484.5 milyon manata çatıb.

Banker.az Mərkəzi Bankın məlumatlarına istinadən xəbər verir ki, qeyri-rezidentlərin depozitləri ötən ilin iyul ayı ilə müqayisədə 122.2 milyon manat və ya 9% artıb. 2025-ci ilin iyulunda bu göstərici 1 milyard 362.3 milyon manat təşkil edib.

Bununla belə, ilin əvvəlindən qeyri-rezident depozitlərində 24 milyon manat və ya 1.6% azalma qeydə alınıb. Yanvarın əvvəlində göstərici 1 milyard 508.5 milyon manat olub.

İllik artım əsasən milli valyutada olan depozitlərin artması hesabına formalaşıb. Belə ki, iyulda qeyri-rezidentlərin manat depozitləri 694.3 milyon manat təşkil edib ki, bu da ötən ilin eyni ayı ilə müqayisədə 160.8 milyon manat və ya 30.1% çoxdur. Halbuki, yerli əhalinin manatdakı depozitləri illik müqayisədə 23% artaraq 12 mlrd. 181 mln. manata yüksəlib.

İlin əvvəlindən isə manat depozitləri 102.7 milyon manat və ya 17.4% artıb.

Xarici valyutada olan depozitlər isə əksinə, həm illik, həm də ilin əvvəlindən azalıb. İyulda bu kateqoriya üzrə depozitlər 790.2 milyon manat təşkil edib. Bu, ötən ilin iyuluna nisbətən 38.6 milyon manat və ya 4.7% azdır.

İlin əvvəlində qeyri-rezidentlərin xarici valyutada depozitləri 916.9 milyon manat olduğu halda, iyulun sonunda 126.7 milyon manat və ya 13.8% azalaraq 790.2 milyon manata düşüb.

Beləliklə, iyulun sonunda qeyri-rezidentlərin depozitlərinin 46.8%-i manat, 53.2%-i isə xarici valyutada formalaşıb. Bir il əvvəl bu nisbət müvafiq olaraq 39.2% və 60.8% olub. Bu isə qeyri-rezident depozitlərində də manatlaşmanın gücləndiyini göstərir.