Fransa prezidenti Emmanuel Makron yaxın vaxtlarda Suriyaya rəsmi səfər edəcək. Bu barədə Suriya prezident administrasiyasının İctimai Əlaqələr İdarəsi məlumat yayıb. Suriyanın SANA agentliyi xəbər verir ki, bu, 2009-cu ildə Nikolas Sarkozinin səfərindən sonra Fransa liderinin ölkəyə ilk səfəri olacaq.
Agentliyin məlumatına görə, Makron Suriyanın keçid dövrü prezidenti Əhməd əş-Şaraa ilə danışıqlar aparacaq. Tərəflər ikitərəfli münasibətlərin möhkəmləndirilməsini, həmçinin qarşılıqlı maraq doğuran regional və beynəlxalq məsələləri müzakirə edəcəklər.
Fransa prezidentini investorlar və Fransa şirkətlərinin nümayəndələrindən ibarət nümayəndə heyəti müşayiət edəcək. Agentliyin fikrincə, bu, tərəflərin təkcə siyasi deyil, həm də iqtisadi dialoqu inkişaf etdirmək niyyətindən xəbər verir. İki ölkənin lideri nümayəndə heyətlərinin iştirakı ilə dəyirmi masa keçirəcək.
2025-ci ilin mayında Əhməd əş-Şaraa Parisə səfər edərək Makronla Yelisey Sarayında görüşmüşdü. Həmin ilin noyabrında BMT-nin Təhlükəsizlik Şurası əş-Şaraaya qarşı sanksiyaların ləğv edilməsini nəzərdə tutan qətnamə qəbul etmişdi.
2025-ci ilin oktyabrında Suriya prezidenti bəyan etmişdi ki, Dəməşqin Moskva ilə münasibətləri Qərblə əlaqələrin inkişaf etdirilməsinə mane olmur.
