“Rusiya Ukraynadakı qoşunlarını dərhal geri çəkməlidir“
G7 ölkələri Rusiya qoşunlarının Ukraynaya daxil olması ilə bağlı birgə bəyanat yayıb.
Bəyanata Kanada, Fransa, Almaniya, İtaliya, Yaponiya, Böyük Britaniya və Amerika Birləşmiş Ştatlarının xarici işlər nazirləri və Avropa İttifaqının Ali Nümayəndəsi tərəfindən imza atılıb.
Bəyanatda deyilir:
“Rusiya Ukraynaya qarşı davam edən ,mülki əhaliyə ciddi təsir göstərən və mülki infrastrukturu məhv edən hücumunu dərhal dayandırmalı, hərbi qüvvələrini dərhal geri çəkməlidir. Prezident Putin növbəti təcavüzü ilə Rusiyanı dünyadan təcrid etdi. Bunu Birləşmiş Millətlər Təşkilatının Baş Assambleyasında Rusiyanın təcavüzünü pisləyən və qoşunlarını dərhal geri çəkməyə çağıran səs çoxluğu sübut edir. Biz Rusiyanı beynəlxalq humanitar hüquq və insan hüquqları qanunlarına tam hörmət etmək öhdəliyini yerinə yetirməyə çağırırıq. Ukrayna və BMT-nin humanitar qurumlarına, tibb işçilərinə və qeyri-hökumət yardımçılarına Ukraynanın beynəlxalq səviyyədə tanınmış sərhədləri daxilində dərhal ehtiyacı olan insanlara təhlükəsiz, sürətli və maneəsiz çıxış təmin edilməlidir. Biz humanitar yardımın əldə edilməsinə dair razılaşmanın elan edilməsini vacib ilk addım kimi qəbul edirik. Bu, etibarlı və sürətlə həyata keçirilməlidir. Dinc məqsədlər üçün nəzərdə tutulmuş nüvə obyektlərinə hər hansı silahlı hücum və onlara qarşı təhdid beynəlxalq hüququn prinsiplərinin pozulması deməkdir. Biz bu gün MAQATE-nin baş direktoru Qrossinin Ukraynadakı nüvə obyektlərinin təhlükəsizliyini və təhlükəsizliyini təmin etmək üçün Ukrayna və Rusiya arasında saziş imzalanması təşəbbüsünü dəstəkləyirik”.
