ABŞ-nin nüfuzlu bankı “Goldman Sachs”in əsas ssenarisinə görə, qızılın qiyməti 2025-ci ilin əvvəlinə qədər unsiya başına 2 700 ABŞ dollarına qədər bahalaşa bilər (hazırki qiymətlərə nisbətdə +3%). Lakin digər bir ssenariyə görə, qiymətli metal əlavə olaraq daha 15% bahalaşaraq unsiya başına 3 100 dollar həddinə çata bilər.
Banker.az xəbər verir ki, əsas ssenaridə qızıla dəstək verən amillərdən biri dünya mərkəzi banklarının qiymətli metal alımlarını davam etdirməsidir. “Goldman Sachs” strategiyalarına görə, onların motivasiyası ABŞ-nin tətbiq edə biləcəyi sanksiyalardan qorxuları və ölkənin dövlət borcu ilə bağlı narahatlıqları olacaq.
Bundan əlavə, ABŞ-də faiz dərəcələrinin azalması fonunda qızıla yönəlmiş birjalarda satılan fondlara (ETF) kapital axını səbəbindən qızıl yüksək tələb görməlidir.
Bununla yanaşı, qızıl unikal bir alət olaraq, geosiyasi risklər, ABŞ və Çin arasındakı ticarət müharibəsi riskləri, maliyyə siyasəti riskləri, borc böhranı riskləri və resessiya risklərinə qarşı hedcləmə imkanı verir, “Goldman Sachs”ın ekspertləri yazırlar.
Bankın təhlili göstərir ki, aşağıda göstərilən iki ssenaridən hər hansı biri baş verərsə, qızıl əlavə olaraq daha 15% bahalaşa bilər. Birinci ssenari – 2022-ci ildən başlayaraq gördüyümüz miqyasda maliyyə sanksiyalarının tətbiqi, ikinci ssenari isə ölkənin dövlət borcu ilə bağlı narahatlıqlar fonunda ABŞ-nin kredit defolt svopları (CDS) spredlərinin bir standart kənarlaşma (13 baza bəndi) genişlənməsi halında baş verə bilər.
