Goldman Sachs Group Inc.-in analitikləri hesab edirlər ki, qarşıdakı bir il ərzində yapon yeni dollar qarşısında 165 səviyyəsinə qədər zəifləyəcək. Bunun əsas səbəbi Yaponiya və ABŞ arasındakı faiz dərəcələri fərqidir.
Bank əvvəlki 155 yenlik proqnozunu 165 yenə yüksəldib və bununla da Bloomberg-in sorğusunda iştirak edən analitiklər arasında ən pessimist proqnozlardan birini təqdim edib. Strateq Karen Reyxqott Fişman hesabatında qeyd edib ki, proqnoza yenidən baxılmasına Yaponiyada fiskal təzyiqlər, ABŞ dövlət istiqrazlarının uzun müddət yüksək gəlirliliyi və Yaponiya Bankının faiz dərəcələrini tədricən artırması səbəb olub.
Goldman Sachs son bir ildə əsas valyutalar arasında ən zəif göstəricilərdən birini nümayiş etdirən və 1986-cı ildən bəri ən aşağı səviyyələrə enən yenə qarşı skeptik yanaşan investor və analitiklərin sayının artmasına qoşulub.
Bazar da yenin daha da zəifləyəcəyi gözləntilərini təsdiqləyir. Ötən ay hedc-fondlar Yapon valyutasının ucuzlaşmasına yönəlmiş mövqelərini 2017-ci ildən bəri ən yüksək səviyyəyə çatdırıblar. Valyuta treyderləri gələn ilin iyununa qədər dolların 165 yenə yüksəlməsi ehtimalını təxminən 72% qiymətləndirirlər.
Bazar ertəsi Asiya sessiyasının əvvəlində yenin məzənnəsi bir dollar üçün 161,79 yen təşkil edib ki, bu da əvvəlki sessiya ilə müqayisədə 0,3% aşağıdır.
Markets Live strateqi Mark Krenfild bildirib: “İnvestorlar 1980-ci illəri xatırlayaraq dolların yen qarşısında nə qədər gücləndiyini bilirlər. Hətta həmin enişdən qismən bərpa belə məzənnənin daha da yüksəlməsinə səbəb ola bilər”.
Goldman Sachs həmçinin yenin kerri-treyd əməliyyatları üçün maliyyələşdirmə valyutası kimi istifadə edilməsini tövsiyə edir. Bu strategiya aşağı faizli yenlə borclanaraq inkişaf etməkdə olan ölkələrin valyutaları kimi yüksək gəlirli aktivlərə investisiya qoyuluşunu nəzərdə tutur.
Şirkətin proqnozuna görə, üç aydan sonra dollar/yen məzənnəsi 162, altı aydan sonra isə 163 səviyyəsində olacaq. Əvvəlki proqnozlar müvafiq olaraq 160 və 158 idi.
Goldman Sachs hesab edir ki, yenin dəstəklənməsi üçün rəsmi valyuta müdaxilələrinin təsiri qısamüddətli olacaq. Xüsusilə də dolların xeyrinə olan faiz dərəcələri fərqi kimi makroiqtisadi amillər təzyiq göstərməyə davam edərsə.
