“Meta” “EssilorLuxottica” (“Ray-Ban”, “Oakley” və digər brendlərin sahibi) ilə birgə hazırladığı “Meta Glasses” ağıllı eynəklərini təqdim edib. “Bloomberg”in qeyd etdiyi kimi, şirkət ilk dəfə bu tip cihazları öz brendi altında bazara çıxarır.
Yeni seriyaya üç model daxildir: “Meta Adventurer”, “Meta Fury” və “Meta Glasses by Kylie (Starfire)”. Sonuncu model Kylie Jenner ilə əməkdaşlıq çərçivəsində hazırlanıb. “MacRumors”un məlumatına görə, ilk iki modelin qiyməti 299 dollar, Kylie Jenner versiyasının qiyməti isə 399 dollar olacaq.
Şirkət çərçivə və linzalar üçün bir neçə rəng variantı təklif edəcək. Həmçinin görmə korreksiyası üçün optik linzaların quraşdırılması da mümkün olacaq. Eynəklər 3K təsvir keyfiyyətinə malik 12 meqapiksellik kamera, altı mikrofon və süni intellekt funksiyalarını dəstəkləyən “Muse Spark” modeli ilə təchiz edilib. Qurğuda ekran nəzərdə tutulmayıb. Batareyanın bir doldurma ilə işləmə müddəti 8 saata qədərdir.
“Bloomberg” yazır ki, “Meta” gələcəkdə kamerasız ağıllı eynəklər də buraxa bilər. Bu modellər zənglər, audio dinləmə və süni intellekt alətləri ilə qarşılıqlı əlaqə üçün nəzərdə tutulacaq və daha aşağı qiymətə təklif edilə bilər.
“Meta” artıq “Meta Ray-Ban” və “Oakley Meta” brendləri altında da ağıllı eynəklər satır. 2025-ci ilin payızında şirkət linzaya inteqrasiya olunmuş ekranla təchiz edilmiş ilk modeli — “Meta Ray-Ban Display” təqdim etmişdi.
