Azərbaycan Respublikasının Maliyyə Bazarlarına Nəzarət Palatası, Azərbaycan Respublikasının Mərkəzi Bankı və Azərbaycan Banklar Assosiasiyasının birgə iştirakı ilə “Nağdsız Cəmiyyət Günləri” layihəsinə start verilmişdir.
Layihə çərçıvəsində 29 oktyabr 2019-cu il tarixində Azərbaycan Banklar Assosiasiyasının və “MilliKart” Prosessinq Mərkəzinin birgə iştrakı ilə Azərbaycan Dövlət İqtisad Universitetində (UNEC) növbəti təlim keçirilmişdir.
“MilliKart” MMC-nin eksperti Müslüm Pənahov tərəfindən nağdsız cəmiyyət, rəqəmsal ödənişlər, beynəlxalq və yerli ödəniş sistemləri, innovativ ödəniş həlləri, həmçinin fırıldaqçılıq hallarına qarşı mübarizə tədbirləri haqqında tədbir iştirakçılarına geniş məlumat təqdim edilmişdir. Eyni zamanda, Azərbaycan Respublikası Prezidentinin 2016-cı il 6 dekabr tarixli 1138 nömrəli Fərmanı ilə təsdiq edilmiş “Azərbaycan Respublikasında telekommunikasiya və informasiya texnologiyalarının inkişafına dair Strateji Yol Xəritəsi”ndə rəqəmsal ödənişlərin genişləndirilməsi ilə bağlı nəzərdə tutulan tədbirlərin icrası və müəyyən olunmuş icra göstəricilərinə nail olmaq məqsədilə hazırlanmış “2018–2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı” barədə də tədbir iştirakçılarına məlumat verilmişdir.
M.Pənahov onu da qeyd etmişdir ki, “MilliKart” strategiyasına uyğun olaraq növbəti dövrlərdə nağdsız cəmiyyət, rəqəmsal ödənişlər, elektron ticarət və digər bu kimi mövzular üzrə maarifləndirici tədbirlərin genişləndirilməsi istiqamətində fəal iştirak edəcəkdir.
Sonda tədbir iştirakçılarının sualları cavablandırılmaqla yanaşı, nağdsız cəmiyyətin inkişafı istiqamətində ölkədə həyata keçirilən uğurlu islahatlar haqqında məlumat mübadiləsi aparılmışdır.
