OPEC+ ölkələri neft hasilatına qoyulan məhdudiyyətləri uzatmaq barədə razılaşıb. Mütəxəssislər bunun qlobal tələbatın azalması və OPEC+ üzvü olmayan ölkələrdə hasilatın artması ilə əlaqədar olduğunu bildirirlər.
Alyans bütün OPEC+ iştirakçıları üçün 2025-ci ilin sonuna qədər qüvvədə olan ümumi istehsal həddini 2026-cı ilə qədər uzadıb. BƏƏ üçün isə kvotanın tədricən 300 min barel artırılması planları 2025-ci ilin yanvarından aprel ayına təxirə salınıb.
Səkkiz ölkə (Əlcəzair, İraq, Səudiyyə Ərəbistanı, Küveyt, BƏƏ, Qazaxıstan, Rusiya və Oman) könüllü olaraq istehsal məhdudiyyətlərini uzatmaq qərarına gəlib.
OPEC-in press-relizində Səudiyyə Ərəbistanının liderliyindəki rolu ayrıca qeyd edilib. “OPEC+ ölkələri Səudiyyə Ərəbistanı krallığına müstəsna liderliyinə və qlobal neft bazarının sabitliyinə sarsılmaz sadiqliyinə görə dərin minnətdarlıqlarını bildirirlər. Şahzadə Əbdüləziz bin Salmanın sədrliyi altında OPEC+ ölkələri uzaqgörənliklə çətinliklərin öhdəsindən gəldilər, konsensusun yaradılması səyləri vasitəsilə birliyi təşviq etdilər və neft bazarında tarazlıq və şəffaflığı təmin etdilər”, – mesajda deyilir.
Hesabatda həmçinin xatırladılır ki, ölkələr bazar şəraitindən asılı olaraq sutkada 2.2 milyon barel hasilat artımını dayandıra və ya ləğv edə bilərlər.
