OpenAI-nin baş direktoru Sem Altman şirkət əməkdaşları ilə daxili yazışmada OpenAI-nin IPO keçirməyi planlaşdırdığını bildirib. Reuters bu barədə The Information nəşrinin məlumatına istinadən xəbər verir.
Altmanın sözlərinə görə, şirkət səhmlərini açıq bazarda “növbəti (2027-ci) il ərzində” yerləşdirə bilər. O qeyd edib ki, OpenAI-nin ABŞ Qiymətli Kağızlar və Birja Komissiyasına (SEC) təqdim etdiyi məxfi ərizə şirkətə IPO üçün uyğun zamanı seçmək imkanı verir və bu, həm daha tez, həm də daha gec baş verə bilər.
Altman bildirib ki, yerləşdirmənin vaxtı “geniş amillər dairəsindən” asılı olacaq. Onun sözlərinə görə, əgər OpenAI digər süni intellekt sistemlərini müstəqil şəkildə yarada bilən rekursiv özünütəkmilləşdirən süni intellekt hazırlaya bilsə, IPO keçirmək motivasiyası azalacaq.
O, həmçinin əməkdaşlara OpenAI-nin hər səhm üçün 687,69 dollar qiymətindən səhmlərin geri alınmasına hazırlaşdığını bildirib.
Bundan əvvəl CNBC OpenAI-nin səhmlərini 2026-cı ilin dördüncü rübündə birjaya çıxarmağı planlaşdırdığını yazmışdı. The Wall Street Journal-ın mənbələri isə IPO-nun sentyabr ayında keçiriləcəyini bildirmişdilər.
OpenAI-nin əsas rəqiblərindən biri olan Anthropic də 2026-cı ilin iyununda SEC-ə sənədlər təqdim etdiyini açıqlayıb. Şirkətin birjada nə vaxt yerləşdiriləcəyi hələ məlum deyil. Anthropic fevral ayında 380 milyard dollar dəyərləndirmə ilə investisiya cəlb etmiş, mayın sonunda isə onun bazar dəyəri 965 milyard dollara yüksəlmişdi.
