Cari ilin I rübündə “Rabitəbank” ASC-nin aktivləri ötən ilin analoji dövrü ilə müqayisədə 32,84% artaraq 428,161 mln. manata çatıb.
Hesabat dövründə bankın kredit portfeli 12,7% azalaraq 190,469 mln. manat olub. Kredit portfeli kiçilsə də, vaxtı keçmiş (problemli) kreditlərin həcmi 14,43% və ya 1,604 mln. manat artaraq 12,718 mln. manata çatıb. Problemli kreditlərin ümumi portfeldə payı da artıb – ötən ilin I rübündə bu göstərici 4,8% olduğu halda, hazırda 6,1%-dir.
Aktivlərin strukturunu nəzər salanda məlum olur ki, likvid aktivlərin həcmi 2,66 dəfə artaraq 172,855 mln. manat təşkil edib. Bu ilin ilk 3 ayında bank qiymətli kağızlara 12,645 mln. manat investisiya yatırıb.
Yanvar-mart ayları ərzində bankın öhdəlikləri 14,91% artaraq 370,124 mln. manat olub. Öhdəliklərin strukturunda əsas yeri müştərilərin müddətli depozitləri tutur – 209,685 mln. manat.
Bankın nizamnamə kapitalı dəyişməz olaraq 48,5 mln. manat səviyyəsində qaldığı halda, məcmu kapitalı 2,57% azalaraq 58,037 mln. manat olub.
“Rabitəbank” I rübü 12 min manatlıq mənfəətlə başa vurub. Müqayisə üçün qeyd edək ki, ötən ilin analoji dövründə bankın mənfəəti 998 min manat təşkil edib.
APA
