“Reebok” şirkəti Rusiyadakı mağazalarının adını dəyişdirərək, bu ölkədə fəaliyyətini davam etdirdiyini açıqlayıb. Bildirildiyi kimi, şirkətin yeni adı “Sneaker Box” olub. Təqdim olunan məhsullar, o cümlədən geyim üzərindəki loqo əvvəlki kimi qalacaq.
Banker.az bu barədə “Vc.ru”ya istinadən xəbər verir.
Moskvada mağazalar sentyabrın 12-sindən sonrakı həftədə işə başlayacaq. Bütün Rusiya üzrə isə mağazalarda satış oktyabr ayından əvvəl başlayacaq.
Xatırladaq ki, 2022-ci ilin may ayında “Reebok”un Rusiyadakı biznesi ölkə daxilində 100 mağazası olan Türkiyənin “FLO” holdinqinə satılıb.
“FLO” – 1960-cı illərin əvvəllərində yaradılmış bir şirkətdir. Pərakəndə satıcı bir neçə digər şirkəti də idarə edir. Onlar sırasında “Kinetix”, “Polaris”, “Polo Assn” və digərləri var. 12 may 2022-ci il tarixində “Yeni Şafak” nəşri “Reebok”un “FLO” ilə müqavilə imzaladığını və bu müqaviləyə əsasən türk holdinqinin 12 ölkə üçün brend məhsullar istehsal edəcəyini yazıb.
