Qətərdən olan vasitəçilər İran rəsmiləri ilə Vaşinqton və Tehran arasında gərginliyin azaldılması məqsədilə görüşlər keçirmək üçün İrana gəliblər. Bu barədə Reuters agentliyi mənbəyə istinadən məlumat yayıb.
Mənbənin sözlərinə görə, məsləhətləşmələr ABŞ ilə koordinasiya şəraitində aparılır. Onların əsas məqsədi daha geniş dialoqun davam etdirilməsi üçün şərait yaratmaq, həmçinin ABŞ və İran arasında əldə olunmuş atəşkəs memorandumunun icrasını müzakirə etməkdir.
Agentliyin həmsöhbəti əlavə edib ki, tərəflər son eskalasiyaya səbəb olan problemlərin, o cümlədən Hörmüz boğazında gəmiçilik azadlığının təmin edilməsi ilə bağlı fikir ayrılıqlarının aradan qaldırılmasını da müzakirə edirlər.
Fars körfəzində vəziyyət iyulun 7-nə keçən gecə Hörmüz boğazından keçməyə çalışan kommersiya tankerlərinə hücumlardan sonra kəskinləşib. Bundan sonra ABŞ İran ərazisinə bir sıra zərbələr endirib, Tehran isə cavab olaraq bölgədəki ABŞ hərbi obyektlərini hədəfə alıb.
