Amerikanın “Roblox” oyun platforması 41.9 milyard dollar qiymətləndirmə ilə birjaya çıxıb.
Banker.az bu barədə “Vc.ru”ya istinadən xəbər verir.
Qeyd edək ki, şirkət bunu IPO deyil, birbaşa listinq yolu ilə edib.
2019-cu ilin iyulunda investorlar “Roblox”u 2.5 milyard dollar, 2020-ci ilin fevralında isə 4 milyard dollar dəyərində qiymətləndirib.
Şirkət 2020-ci ilin noyabrında IPO üçün müraciət göndərib və Nyu-York fond birjasında “RBLX” tikeri altında 1 milyard dollarlıq səhm yerləşdirməyi planlaşdırıb.
“Roblox” – virtual dünyalar və oyunlar yaratmağa imkan verən platformadır. Platformanın beta-versiyası 2004-cü ildə Devid Bashutski və Erik Kassel tərəfindən tərtib edilib.
“Roblox” xalq arasında “ikinci Minecraft” və “oyun dünyasının YouTube-u” adlandırılır. Onun auditoriyası əsasən uşaqlar və yeniyetmələrdir.
