Külli miqdarda rüşvət almaqda ittiham olunan Qaradağ Rayon Prokurorluğunun sabiq müstəntiqi Emin Seyidov barəsində cinayət işi üzrə məhkəmə araşdırması başa çatıb.
Bakı Ağır Cinayətlər Məhkəməsində hakim Faiq Qəniyevin sədrliyi ilə keçirilən iclasda hökm oxunub.
Məhkəmə Emin Seyidova münasibətdə Cinayət Məcəlləsinin 70-ci (şərti məhkumetmə) maddəsini tətbiq edib.
Təqsirləndirilən şəxs sınaq müddəti seçilməklə azadlıqda qalıb.
Qeyd edək ki, Emin Seyidov intihara cəhd hadisəsində rüşvət tələb etməkdə təqsirləndirilir. 2021-ci ildə özünə xəsarət yetirərək, canına qəsd edən Gülşad Mirzəyeva Qaradağ rayon Prokurorluğunda ifadəsində üç nəfərdən şikayətçi olub. Mirzəyeva sözügedən üç nəfərin onu intihar həddinə çatdırdığını iddia edib.
Sözügedən iş prokurorluğun müstəntiqi Seyidovun icraatında olub.
Emin Seyidov işlə bağlı Elçin Nağdəliyev, Emin Oruczadə və Sərxan Quliyev adlı həmin üç nəfərdən 30 min manat pul tələb edib. Əks halda, CM-in 125-ci (özünü öldürmə həddinə çatdırma) maddəsilə cinayət məsuliyyətinə cəlb olunacaqlarını deyib. Danışıqlardan sonra məbləğ 10 min manata düşüb.
Onun barəsində Cinayət Məcəlləsinin 311.3.3 (təkrar külli miqdarda rüşvət alma) maddəsi ilə cinayət işi başlanıb, barəsində ev dustaqlığı qətimkan tədbiri seçilib.
Təqsirləndirilən şəxs məhkəmədə ittihamda yazılanları təkzib edib, özünü təqsirli bilməyib.
