ABŞ şirkətlərinin ikinci rüb üzrə hesabatları göstərib ki, süni intellektin tətbiqinə çəkilən xərclər artıq xalis mənfəət marjasına müsbət təsir göstərməyə başlayıb. Bloomberg yazır ki, bu, sahəyə yönəldilən nəhəng investisiyaların özünü doğrultmayacağından ehtiyat edən investorlar üçün mühüm siqnaldır. Üstəlik, rentabelliyin artdığını bildirən şirkətlər arasında texnologiya sektorundan uzaq bizneslərin sayı getdikcə çoxalır.
Süni intellekt rentabelliyə nə qədər əlavə edir?
S&P 500 indeksinə daxil olan şirkətlərin təxminən 90%-i artıq ikinci rüb üzrə hesabatlarını açıqlayıb və onlardan təxminən 25-i süni intellektin biznesə təsirini ayrıca ölçüb.
22V Research analitiklərinin hesablamalarına görə, süni intellekt orta hesabla xalis mənfəət marjasını 180 bazis bəndi, yəni 1,8 faiz bəndi artırıb. Süni intellektin təsirini məhsuldarlığın artırılmasının digər üsulları ilə birlikdə hesablayan şirkətlər nəzərə alınmasa, göstərici 150 bazis bəndi təşkil edir.
22V Research-in rəhbəri Dennis Debyuşer hesab edir ki, bu yaxşılaşmanı bütün indeksə şamil etsək, S&P 500-ün fundamental baxımdan əsaslandırılmış səviyyəsi hazırkı göstəricidən təxminən 10% yüksək ola bilər.
Bununla belə, o qeyd edib ki, ilkin hesablamaların dəqiqliyindən daha vacib olan trendin istiqamətidir. Mövcud tendensiya isə göstərir ki, gələcəkdə rentabelliyin artdığını bildirən şirkətlərin sayı daha da çoxalacaq.
Effekt hansı bizneslərdə görünür?
Süni intellektin faydası barədə müxtəlif sahələrdə fəaliyyət göstərən şirkətlər məlumat verib.
Məsələn, ABŞ-nin ən böyük tullantı toplama və emalı şirkəti Waste Management marşrutların optimallaşdırılması, müştəri xidmətinin yaxşılaşdırılması və əməliyyat xərclərinin azaldılması nəticəsində Smart Truck platformasının illik EBITDA töhfəsinin 300 milyon dolları keçdiyini bildirib.
Kredit tarixçələri bürosu Equifax-da qeyd ediblər ki, xərclərin optimallaşdırılması və məhsuldarlığın yüksəlməsinin təsiri məhz 2026-cı ildə nəzərəçarpacaq dərəcədə özünü göstərməyə başlayıb.
Logistika şirkəti CH Robinson Worldwide süni intellekt sayəsində məhsuldarlığın 60% artdığını açıqlayıb.
Sığorta brokeri Willis Towers Watson isə xərclərin 400 milyon dollar azaldığını və bunun “əsasən proseslərin avtomatlaşdırılması hesabına” baş verdiyini bildirib.
Bloomberg qeyd edir ki, investorlar rentabelliyini artıran şirkətləri mükafatlandırmağa hazırdırlar. Məsələn, iqlim və yanğından mühafizə sistemləri istehsalçısı Johnson Controls International marjanı 260 bazis bəndi yaxşılaşdırıb. Şirkətin səhmləri iyulun 29-da hesabatın açıqlanmasından sonra 11% bahalaşıb.
Bu niyə vacibdir?
Investorların əsas narahatlıqlarından biri süni intellektə yönəldilən milyardlarla dollarlıq investisiyaların heç vaxt geri qayıtmayacağı və nəzərəçarpacaq iqtisadi effekt yaratmayacağı ilə bağlı idi.
Bu narahatlıqlar “dairəvi maliyyələşdirmə” sxemləri barədə xəbərlərlə daha da güclənir. Belə sxemlərdə süni intellekt üçün çip istehsal edən şirkət başqa şirkətlərə investisiya yatırır, həmin şirkətlər isə aldıqları vəsaitlə yenidən həmin istehsalçının çiplərini satın alırlar.
Şirkətlərin rentabellik artımı ilə bağlı açıqladığı məlumatlar, xüsusilə də rəhbərlərin süni intellektin gələcək tətbiqindən daha böyük müsbət effekt gözləmələri, bütün bu prosesin böyük bir “süni intellekt köpüyü” olduğu barədə arqumentlərin bir hissəsini zəiflədir.
