Yarımkeçirici nəhəngi Taiwan Semiconductor Manufacturing Co. (TSMC) ABŞ-nin Arizona ştatında istehsalını genişləndirərkən çətinliklərlə üzləşib. Bu barədə Reuters agentliyi şirkətin maliyyə direktoru Uendell Huana istinadən məlumat yayıb.
Onun sözlərinə görə, TSMC-nin Arizonadakı ilk zavodu artıq fəaliyyət göstərir və yararlı çiplərin istehsal göstəricisi “Tayvandakı flaqman zavodundakından heç də pis deyil”. Süni intellekt çiplərinə yüksək tələbat səbəbindən şirkət Arizonadakı layihəyə investisiyaları daha 100 milyard dollar artırmaq qərarına gəlib. Şirkət layihənin gedişatından “çox razıdır” və bununla da ümumi investisiyaların həcmi 265 mlrd dollara çatacaq.
“Lakin fiziki məhdudiyyətlər mövcuddur — əlçatan tikinti işçilərinin sayı və mövcud infrastruktur. Bu problemlərin həlli üçün hökumətlə sıx əməkdaşlıq edəcəyik”, – deyə Huang bildirib.
Arizonadakı ikinci zavodda tezliklə avadanlıqların quraşdırılmasına başlanılacaq, üçüncü zavodun tikintisi artıq davam edir, dördüncü zavod və çiplərin qabaqcıl qablaşdırılması kompleksi üçün isə hazırlıq işlərinə başlanılıb. Ümumilikdə TSMC-nin ABŞ-dəki irimiqyaslı layihəsi 12 müəssisənin və elmi-tədqiqat mərkəzinin yaradılmasını nəzərdə tutur. Huang bazar şəraitinin əlverişli olacağı təqdirdə maliyyə vəsaiti cəlb etmək üçün yeni istiqrazların buraxılmasını da istisna etməyib.
Reuters qeyd edir ki, ABŞ-də istehsalın genişləndirilməsi Prezident Donald Tramp administrasiyasının təzyiqi fonunda baş verir. Administrasiya ABŞ-nin qlobal yarımkeçirici istehsalındakı payını 50%-ə çatdırmağa çalışır. Bununla yanaşı, TSMC Tayvandakı istehsal sahələrini də inkişaf etdirməyə davam edir və burada daha 13 zavod tikilir. Huangın sözlərinə görə, fundamental tədqiqatlar və ən qabaqcıl texnologiyalar həmişə ilk olaraq Tayvanda tətbiq ediləcək, daha sonra isə xaricdəki istehsal sahələrinə ötürüləcək.
