ABŞ hakimiyyəti Ukraynaya 1.25 milyard dollar maliyyə dəstəyi ayırıb, bu barədə Ukraynanın Baş naziri Denis Şmıqal “Twitter” hesabında bildirib. Onun sözlərinə görə, pul dövlət büdcəsinin dəstəklənməsinə, xüsusən də sosial və humanitar xərclərə yönəldiləcək.
Banker.az bu barədə Kommersant-a istinadən xəbər verir.
Vəsaitlər Dünya Bankının (DB) Ukraynada inzibati potensialın gücləndirilməsi üçün dövlət xərclərinin dəstəklənməsi layihəsi çərçivəsində köçürülüb. Qeyd edək ki, mart və aprel aylarında da analoji məbləğdə qrantlar göndərilib.
2022-ci ilin dekabrında Dünya Bankı “təcili ehtiyacları” ödəmək üçün Ukraynaya 610 milyon dollar ayırıb. 2023-cü ilin fevral ayında ölkə bankdan daha 2.5 milyard dollar alıb. Ukraynanın Maliyyə Nazirliyi xarici tərəfdaşlardan ölkənin aylıq tələb etdiyi yardımın həcmini 3 milyard dollar səviyyəsində qiymətləndirib.
