Çinin Unitree Robotics şirkətinin səhmləri Şanxay Fond Birjasında ilk ticarət gününə 629%-lik artımla başlayıb. Bloomberg yazır ki, şirkət IPO zamanı 6,1 milyard yuan, yəni təxminən 904 milyon dollar cəlb edib. Bununla Unitree materik Çində birjada ticarət olunan ilk insanabənzər robot istehsalçısına çevrilib.
Rəsmi adı Yushu Technology olan şirkətin səhmləri IPO zamanı müəyyən edilmiş 150,8 yuan qiymətdən 1 100 yuana qədər yüksəlib. Açılış qiyməti əsasında Unitree-nin bazar kapitallaşması 445 milyard yuana çatıb. Bu göstərici Apple-ın təchizatçılarından biri olan Luxshare Precision Industry-nin bazar dəyəri ilə müqayisə oluna bilər.
Unitree IPO-dan əldə etdiyi vəsaitin təxminən 4,2 milyard yuanını süni intellekt modellərinin hazırlanmasına, insanabənzər robotlar üzrə tədqiqatlara, yeni məhsulların yaradılması proqramlarına və istehsal güclərinin genişləndirilməsinə yönəltməyi planlaşdırır.
