ABŞ-nin S&P 500 indeksi üzrə fyuçerslər 1,02% artaraq 7 759,75 bənd səviyyəsindədir. Cümə axşamı S&P 500 indeksi 1,04% yüksələrək 7 745,33 bəndə, Dow Jones 1,14% artaraq 53 666,26 bəndə, Nasdaq 100 isə 1,16% yüksələrək 29 483,35 bəndə çatıb.
ABŞ bazarında optimizmə səbəb Federal Ehtiyat Sisteminin İdarə Heyətinin üzvü Kristofer Uollerin açıqlamaları olub. O bildirib ki, inflyasiya təzyiqinin zəiflədiyini göstərən məlumatlar təsdiqlənərsə, FED-in qarşıdakı iclasında faiz dərəcəsinin dəyişməz saxlanmasını dəstəkləyəcək. Hazırda bazarlar sentyabr iclasında faiz dərəcəsinin saxlanılması və artırılması ehtimallarını demək olar ki, eyni səviyyədə qiymətləndirirlər. Bununla yanaşı, Yaxın Şərqdə davam edən böhran fonunda yüksək neft qiymətlərinin inflyasiyanı yenidən sürətləndirə biləcəyi ilə bağlı risklər bazar üçün məhdudlaşdırıcı amil olaraq qalır.
Broadcom səhmləri cari maliyyə ilinin dördüncü rübü üzrə gəlir proqnozunun Uoll-stritin yüksək gözləntilərini doğrultmamasından sonra 2,74% ucuzlaşaraq beş aylıq minimuma düşüb. Snowflake səhmləri isə illik gəlirlə bağlı güclü proqnozlardan sonra 16,55% bahalaşaraq 2021-ci ilin dekabrından bəri ən yüksək səviyyəyə çatıb.
Nvidia səhmləri 1,8%, Intel 1,8%, Apple 1%, Microsoft isə 2,68% bahalaşıb.
Asiya bazarları da Uoll-stritin ardınca yüksəlir. Yaponiyanın Nikkei 225 indeksi 1,15% artaraq 64 952,75 bəndə, Cənubi Koreyanın Kospi indeksi 1,85% yüksələrək 6 700,91 bəndə çatıb. Honq Konqun Hang Seng indeksi 2,08% artaraq 25 737,6 bənd, Çinin Shanghai Composite indeksi isə 0,35% yüksələrək 3 955,85 bənd səviyyəsindədir.
Neft qiymətləri səhər saatlarında cüzi dəyişir. Brent markalı neft üzrə fyuçerslər 0,14% artaraq bir barel üçün 95,65 dollara, WTI fyuçersləri isə 0,38% yüksələrək 91,65 dollara çatıb.
