Volkswagen Direktorlar Şurası şirkətin 2030-cu ilədək restrukturizasiyası planını rəsmən təsdiqləyib. Bloomberg və AP-nin məlumatına görə, plan çərçivəsində avtomobil istehsalçısı 50 minədək əməkdaşı ixtisar edəcək, model sırasını iki dəfə azaldacaq və Almaniyada dörd zavodu bağlayacaq.
İxtisarların və digər dəyişikliklərin konkret hansı tarixlərdə həyata keçiriləcəyi açıqlanmayıb. Bununla belə, həmkarlar ittifaqı ilə razılaşmaya əsasən, şirkətdə 2030-cu ilədək məcburi işdən çıxarmalar qadağandır. Reuters yazır ki, bağlanacaq zavodlarda istehsalın 2031–2034-cü illər arasında dayandırılması nəzərdə tutulur.
Volkswagen hələ 2026-cı ilin martında həmkarlar ittifaqı ilə 2030-cu ilədək əlavə 50 min əməkdaşın ixtisarı barədə razılığa gəlmişdi. Yeni planla birlikdə ümumi ixtisarların sayı 100 min nəfərə çata bilər. Hazırda Volkswagen-də təxminən 650 min nəfər çalışır.
Şirkət bildirir ki, işçi sayını “iqtisadi reallıqlara uyğunlaşdırmaq” zəruridir. Volkswagen restrukturizasiyanı artan rəqabət, xüsusilə Çin avtomobil istehsalçılarının təzyiqi, avtomobil sənayesində texnoloji dəyişikliklər və ABŞ-nin idxal avtomobillərinə tətbiq etdiyi gömrük rüsumları ilə əsaslandırır.
