ABŞ Müdafiə Nazirliyinə (Pentaqon) İrana qarşı hərbi əməliyyat nəticəsində yaranmış maddi itkilərin qarşılanması üçün 80 milyard dollar lazımdır. Bu məbləği Pentaqonun müavini Stiven Faynberq konqresmenlərlə telefon danışıqları zamanı tələb edib. Bu barədə mənbələrə istinadən “The Wall Street Journal” (WSJ) yazır.
Nəşrin məlumatına görə, hərbi qurumun rəsmiləri etiraf edirlər ki, artıq payız aylarına qədər Pentaqonun əməliyyatların maliyyələşdirilməsi üçün vəsaiti tükənə bilər. Buna görə də onlar Konqresi hərbi xərclərlə bağlı yeni qanun layihəsini qəbul etməyə çağırırlar.
Öz növbəsində, qanunvericilər ABŞ Prezidenti Donald Tramp administrasiyasından İrana qarşı əməliyyata çəkilən xərclər barədə tam məlumat təqdim etməyi tələb edirlər.
WSJ bildirir ki, Konqresdə bəzi üzvlər digər regionlarda lazım ola biləcək qiymətli sursat ehtiyatlarının xərcləndiyindən narahatdırlar.
ABŞ və İsrailin İrana qarşı hərbi əməliyyatı fevralın 28-də başlayıb. İyunun 15-də ABŞ və İran razılığa gəldiklərini açıqlayıblar. Tərəflər arasında qarşılıqlı anlaşma memorandumunun iyunun 19-da Cenevrədə imzalanması nəzərdə tutulur.
