“Xiaomi” elektrik avtomobili gələn il satışa çıxarılacaq. Çin şirkəti dekabrın 28-də ilk elektrik avtomobilində istifadə edilən qabaqcıl texnologiyaların nümayiş etdiriləcəyi təqdimatı açıqlayıb. “SU7” adlandırılan yeni elektrik avtomobil bu yaxınlarda ictimai yollarda sınaqdan keçirilərkən görüntülənib.
Tizer təsvirdə “Xiaomi SU7″ elektromobili boz rəngdədir, lakin satışın başlanğıcında digər rəng seçimləri görünə bilər. Fotoların altındakı şərhdə deyilir: “Salam, Xiaomi SU7. İnsan, avtomobil və ev dünyasına xoş gəlmişsiniz”.
Dərc edilmiş şəkil, həmçinin, elektrikli avtomobilin “Xiaomi”nin “HyperOS” əməliyyat sistemi ilə təchiz ediləcəyini təsdiqləyir ki, bu da “Xiaomi” avtomobili ilə “Xiaomi” telefonu arasında düzgün proqram təminatı inteqrasiyasını təmin etməlidir.
Fotoda “Mi” loqosu da görünür. Göründüyü kimi, avtomobildə yan görünüş güzgüsünə quraşdırılmış kamera var və o, ətrafınızın aydın görünüşünü təmin etməlidir. Konseptual olaraq “Tesla”nın həllərini xatırladan avtomobilin içərisində arxa görünüş güzgüsü və böyük məlumat-əyləncə ekranını da görə bilərik. Görünür, “Xiaomi” kiçik yan güzgülərə üstünlük verib. Avtomobilin ümumi estetikasını artıran səliqəli qapı tutacaqları var.
“SU7” modeli “Tesla”, “NIO”, “Geely” və bu seqmentin digər oyunçuları ilə rəqabət aparmağa yönəlmiş lüks elektrik avtomobil kimi təqdim edilir. Prototipin əvvəllər yayımlanmış şəkilləri damda quraşdırılmış LiDAR sensorunun mövcudluğunu təsdiqləyir. İncə LED faralar və maili kapot da diqqəti cəlb edir və avtomobilə dinamik görünüş verir. “Weibo”da dərc olunan təsvirə əsasən, “SU7 Max”ın flaqman modifikasiyası üz tanıma sistemi ilə də təchiz olunacaq.
