Müəllimləri pərakəndə bankçılıq məhsulları, xüsusilə nağd şəkildə verilən kredit məhsullarının istehlakı üzrə ən aktiv seqmentlərdən biri kimi qeyd etsək yəqin ki yanılmarıq. Gəlirlərinin stabilliyi, məsuliyyət hissinin yüksək olması, həmçinin əksəriyyətinin əlavə gəlirlərinin (repititorluq fəaliyyəti) olması onların bankların müştəri kateqoriyalarında stabil kredit ödəyicisi kimi təsnifləşdirilməsinə gətirib çıxarır. Hətta bəzi banklarda xüsusilə təhsil sektorunda çalışan şəxslər üçün nəzərdə tutulmuş kredit məhsulları da mövcuddur.

Bildiyimiz kimi, 5 Oktyabr tarixi “Beynəlxalq müəllimlər günü”dür. Banklar hər il olduğu kimi bu il də peşə bayramları ərəfəsində müəllimləri yaddan çıxarmamış və onlar üçün fərqli konseptdə olan kampaniyalar hazırlamışdır. Monitorinq qrupumuz müəllimlərin maraqlarını nəzərə alaraq onların üçün təklif edilən kampaniyaların şərtlərini təhlil edib bir yerə toplayıb. Aşağıda həmin kampaniyalar barəsində ətraflı məlumatı və kampaniyaların bitmə tarixlərini Sizlərə təqdim edirik.