Gürcüstanın Baş naziri Giorgi Qaxaria SOCAR-ın prezidenti Rövnəq Abdullayevlə görüşüb.
Bu barədə Baş nazirin mətbuat xidməti məlumat yayıb.
Bildirilib ki, görüş zamanı tərəflər Gürcüstan və Azərbaycan arasındakı mehriban qonşuluq münasibətləri və müxtəlif tərəfdaşlıq sahələri barədə müzakirə aparıblar.
Söhbət zamanı SOCAR-ın Gürcüstanda həyata keçirdiyi investisiya layihələrinə və gələcək əməkdaşlığın dərinləşdirilməsi perspektivlərinə xüsusi diqqət yetirilib.
Gürcüstanın Neft və Qaz Korporasiyasının SOCAR-la təbii qaz sahəsində uğurlu əməkdaşlığının olduğu, bunun da nəticəsinin ölkədəki sosial qazın qiymətinin optimallaşdırılmasına dair razılaşma olduğu qeyd edilib.
Qeyd olunub ki, xüsusilə Gürcüstan hökumətinin təlimatı ilə İqtisadiyyat və Davamlı İnkişaf Nazirliyi, Gürcüstanın Neft və Qaz Korporasiyası və SOCAR şirkəti arasında aparılan danışıqlar nəticəsində Gürcüstan 200 mln. kubmetr endirimli tariflə sosial qaz alacaq.
Məlumatda qeyd olunub ki, 2016-cı ildən bəri qüvvədə olan Sosial Qaz Təchizatı Müqaviləsindəki dəyişiklik, Gürcüstanın İqtisadiyyat və Davamlı İnkişaf naziri Natia Turnava , Neft və Qaz Korporasiyasının baş direktoru Giorgi Baxtadze və SOCAR prezidenti Rövnəq Abdullayev tərəfindən Baş nazir ilə bugünkü görüşdən sonra imzalanıb .
“Razılaşma nəticəsində Gürcüstan hökuməti əhali üçün təbii qaz qiymətinin sabitliyini daha uzun müddət qoruya biləcək. Şahdəniz qazının Avropa bazarına tədarükünü nəzərdə tutan Cənub Qaz Dəhlizinin dördüncü mərhələsi başa çatdıqdan sonra daha çox Azərbaycan qazının Gürcüstan ərazisindən keçəcək. Eyni zamanda, ölkə tələbatını ödəmək üçün Azərbaycan qazını daha sərfəli qiymətə ala biləcək”, – deyə məlumatda qeyd olunub.
