Bu il pensiya ödənişlərinə yönəldilən vəsaitin həcmi artıb.
Banker.az bu barədə Əmək və Əhalinin Sosial Müdafiəsi Nazirliyinə istinadən xəbər verir.
Nazirliyin məlumatına əsasən, 2022-ci ilin yanvar-avqust aylarında pensiya ödənişlərinə 3 mlrd. 276 mln. manat vəsait yönəldilib ki, bu da ötən ilin müvafiq dövrünə nisbətən 5.9% (182 mln.manat) çoxdur.
Qeyd edək ki, cari ilin əvvəlindən minimum aylıq pensiya 20% artırılaraq 240 manata çatdırılıb, pensiyaların sığorta hissəsi indeksləşdirilib. 1.2 mln pensiyaçını əhatə edən bu artımlar üçün illik 440 mln. manat əlavə vəsaitin ayrılması təmin edilib.
Nazirliyin məlumatında o da qeyd olunub ki, bu ilin 8 ayında 18.6 min, elektron pensiya təyinatına başlandığı 2019-cu ilin əvvəlindən 66.9 min pensiya təyinatı e-sistem üzərindən proaktiv qaydada həyata keçirilib.
