Hesablama Palatasının hesabatı Milli Məclisin plenar iclasına tövsiyə olunub.
Hesablama Palatasının 2022-ci ildə fəaliyyəti haqqında Hesabatının Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında müzakirəsi edilib.
Hesablama Palatası tərəfindən aparılan audit fəaliyyəti “Hesablama Palatası haqqında” Azərbaycan Respublikası Qanununun 22-ci maddəsi ilə tənzimlənir.
Hesablama Palatası tərəfindən 2022-ci ilin İş Planına uyğun olaraq 9 maliyyə auditi keçirilib. 2022-ci ilin nəticələrinə əsasən, maliyyə auditlərinin sayı əvvəlki illə müqayisədə azalsa da, əhatə olunan məbləğdə artım qeydə alınıb. Auditlərin əhatə məbləği 5573.3 mln. manat təşkil edib.
Hesabat ilində keçirilmiş maliyyə auditlərində auditorların əsas məqsədi maliyyə hesabatlarının əhəmiyyətli təhriflərdən azad olub-olmaması barədə ağlabatan əminlik əldə etmək və maliyyə hesabatlarının bütün əhəmiyyətli aspektlərdə müvafiq qaydada tərtib edilibedilməməsi barədə rəy bildirməkdən ibarət olub.
Müzakirələrdən sonra hesabat Milli Məclisin plenar iclasına tövsiyə olunub.
