Azərbaycan Respublikasının Elm və Təhsil Nazirliyi yanında Peşə Təhsili üzrə Dövlət Agentliyinə rəhbər təyin edilib.
Banker.az xəbər verir ki, Ceyhun Kərəmov 2 oktyabr 2023-cü il tarixində Agentliyin direktoru vəzifəsinə təyin olunub.
Ceyhun Kərəmov 1981-ci ildə anadan olub.
1999-2003-cü ildə Azərbaycan Dillər Universitetinin Beynəlxalq münasibətlər və regionşünaslıq fakültəsində təhsil almış və fərqlənmə diplomu ilə bitirib.
2004-2006-cı illərdə ABŞ-ın Corciya ştatının Atlanta şəhərindəki Corciya Ştatı Universitetinin Əndryu Young adına siyasət elmləri məktəbində dövlət idarəetməsi üzrə magistr dərəcəsi almışdır. 2018-ci ildə Fransada yerləşən INSEAD biznes məktəbini qlobal biznes idarəçiliyi ixtisası üzrə bitirmişdir. 2016-cı ildə Project Management İnstitute tərəfindən layihələrin idarəedilməsi üzrə peşəkar sertifikasiya (PMP) əldə etmişdir.
Əmək fəaliyyətinə 2002-ci ildən başlamış, beynəlxalq və yerli təşkilatlarda fəaliyyət göstərmişdir. 2003-2004-cü illərdə BMT İnkişaf Proqramı və Azərbaycan hökumətinin birgə layihəsində çalışmışdır. 2006-2020-ci illərdə BP şirkətinin Azərbaycan nümayəndəliyində müxtəlif ekspert və rəhbər vəzifələrində çalışmışdır. 2007-2010-cu illərdə Xəzər Universitetində, 2018-ci ildən isə Bakı Ali Neft Məktəbinin tərkibindəki Layihə İdarəetmə Məktəbində və ADA Universitetinin İctimai və Beynəlxalq Münasibətlər fakültəsində müəllim kimi fəaliyyət göstərmişdir. 2007-2018-ci illərdə gənclər sektorunda beynəlxalq layihələrin və təşkilatların idarə olunmasında fəal iştirak etmişdir.
2020-ci il sentyabr ayının 15-dən etibarən Azərbaycan Respublikasının Elm və Təhsil Nazirliyi yanında Peşə Təhsili üzrə Dövlət Agentliyində direktor müavini vəzifəsində çalışıb. 12 yanvar 2022-ci il tarixindən 2 oktyabr 2023-cü il tarixinədək Peşə Təhsili üzrə Dövlət Agentliyinin direktor səlahiyyətlərini icra edib.
