Cəlilabad rayonunda çiyələyin qiyməti ucuzlaşıb. Mövsümün əvvəlində 5-7 manata satılan bu məhsul hazırda bazarlarda kiloqramı 1 manat 50 qəpiyə təklif edilir.
Məhsulun qiymətinin bu qədər aşağı enməsi fermerlər üçün gözlənilməz olub.
“Ötən il bir kiloqramı 5 manata satdığımız çiyələyin hazırda sahələrdə alış qiyməti 1 manat 50 qəpiyə satılır. Qiymətin belə tez aşağı enməsi gözlənilməz oldu. Əgər qiymət enməsi davam edərsə, çəkdiyimiz xərci çıxara bilməyəcəyik”, – deyə fermer Vüqar Musayev bildirib.
Sahələrdə isə topdansatış qiymətləri daha ucuzdur. Mövcud vəziyyət məhsulun bolluğu və çiyələk sahələrinin genişlənməsi ilə izah edilir.
“Bu il çiyələk sahələrində məhsuldarlıq kifayət qədər yüksəkdir. Qiymətin aşağı olması isə çiyələk sahələrinin xeyli artması ilə əlaqədardır. Bu isə bazarlara daha çox çiyələyin ixrac edilməsinə şərait yardır. Nəticədə qiymətlər ötən illə müqayisədə aşağı düşüb. Məhsulun daha da ucuzlaşacagı istisna edilmir”, – deyə Cəlilabad Dövlət Aqrar İnkişaf Mərkəzinin bitkiçilik sektorunun müdiri Mübariz Nadirov bildirib.
Qeyd edək ki, bu il Cəlilabad rayonunda 580 hektar sahədə çiyələk əkini aparılıb. Bu rəqəm ötənilki göstəricidən 80 hektar çoxdur.
