Çin-ABŞ münasibətləri dünyada ən mühüm əlaqələrdən biridir, iki xalqın rifahı və bütün bəşəriyyətin gələcəyi ondan asılıdır.
Bu fikri Çin Xalq Respublikasının (ÇXR) Sədri Si Cinpin Çin-ABŞ Münasibətləri üzrə Milli Komitənin ənənəvi görüşü iştirakçılarına müraciətində ifadə edib.
“Pekin hər zaman iki ölkə arasında münasibətləri qarşılıqlı hörmət, dinc yaşayış və faydalı əməkdaşlıq prinsiplərinə uyğun qurub”, – deyə müraciətdə bildirilir. Qeyd olunub ki, Pekin hər iki ölkənin iqtisadi uğurlarını faydalı hesab edir və bu istiqamətdə bir-birinə kömək etməli olduğunu düşünür.
“Çin ABŞ-ın tərəfdaşı və dostu olmağa hazırdır və bu, təkcə iki ölkəyə deyil, bütün dünyaya fayda verəcək”, – deyə ÇXR lideri vurğulayıb.
Qeyd edək ki, Çin-ABŞ Münasibətləri üzrə Milli Komitə 1966-cı ildə Birləşmiş Ştatlarda iki ölkə arasında münasibətlərin inkişafında maraqlı olan bir qrup alim, siyasətçi və iş adamı tərəfindən yaradılıb.
