“Meta” korporasiyasının rəhbəri Mark Zukerberq çərşənbə günü ABŞ-nin yeni seçilmiş prezidenti Donald Trampla görüşüb. Bu barədə Trampın gələcək köməkçisi və Ağ Evin siyasət və milli təhlükəsizlik məsələləri üzrə aparat rəhbərinin müavini Stiven Miller “Fox News” telekanalına bildirib.
“Bəli, bu belədir. Mark Zukerberq Donald Trampın rəhbərlik etdiyi islahat hərəkatı sayəsində Amerikada və bütün dünyada gördüyümüz dəyişiklikləri dəstəkləmək istəyini çox açıq şəkildə ifadə edib”, – Miller bildirib.
“The New York Times” görüşün təşəbbüskarının növbəti Amerika lideri ilə “müsbət münasibət qurmağa” çalışan Zukerberq olduğunu yazıb. Nəşrin mənbələri qeyd edir ki, onlar söhbətləşiblər, o cümlədən Zukeberq Trampı prezident seçkilərində qələbəsi münasibətilə təbrik edib.
Qəzet yazır ki, Zukerberq öz korporasiyasını Tramp administrasiyasının mümkün zərbəsindən qorumağa çalışır. “Meta” uzun müddətdir ki, onu demokratların xeyrinə qərəzli olmaqda ittiham edən Vaşinqton mühafizəkarlarının hücumlarının hədəfi olub.
Zukerberq son 18 ay ərzində Trampla münasibətləri yaxşılaşdırmağa çalışır. Seçilmiş prezidentin özü əvvəllər iddia etmişdi ki, iyulda həyatına qəsddən sonra Zukerberq ona zəng edərək noyabr seçkilərində demokratların namizədinə səs verməyəcəyinə söz verib.
