Çin sədri Si Cinpin “Alibaba”nın rəhbəri Cek Ma, o cümlədən ölkənin digər iri sahibkarları ilə görüşüb, bu barədə “Financial Times” yazıb.
O, iş adamlarına özəl sektorun “böyük potensiala” malik olduğunu deyib və ölkədə biznes mühitinin yaxşılaşdırılması üçün bir sıra tədbirlər görəcəyini vəd edib. Si həmçinin sahibkarları əmin edib ki, Kommunist Partiyası dövlət sektorunu gücləndirməklə yanaşı, “şəxsi iqtisadiyyatın inkişafını dəyişməz şəkildə təşviq edəcək, dəstəkləyəcək və istiqamətləndirəcək”.
Onun sözlərinə görə, dövlət orqanları tərəfindən yüksək maliyyə xərcləri və ödənişlərin gecikdirilməsi, habelə özbaşına rüsumlar, cərimələr və yoxlamalar kimi problemlərə hakimiyyət diqqət yetirəcək.
“FT”nin qeyd etdiyi kimi, Çin hakimiyyəti əmlak sektorunda çoxillik tənəzzüldən sonra ölkədə biznes şəraitini yaxşılaşdırmağa çalışır ki, bu da böyük texnoloji şirkətlərin fəaliyyətinə qoyulan məhdudiyyətlərlə yanaşı, investor və istehlakçı əhval-ruhiyyəsini zəiflədib və iqtisadi artımı yavaşladıb.
Qəzetin istinad etdiyi analitiklərin fikrincə, görüş Pekinin özəl sektora daha müsbət münasibət nümayiş etdirmək istəyini göstərir.
